Sobre o seu rexeitamento a un Ministerio no Goberno de España, desvelado onte polo presidente Pedro Sánchez, afirmou que se sentiu “halagado, pero para min o importante é Galicia, custoume moito chegar aquí, moito, pero aquí estou e aquí quero quedar”

O candidato socialista á Presidencia da Xunta asegura que “temos un proxecto de primeira para un goberno de primeira” e “somos o partido das solucións” para sacar ao país do estancamento e a inercia do Partido Popular

Confrontou as solucións dos socialistas ao programa do PP da Xunta “recortar, pintar e colorear: recorto persoal, recorto atención, pinto nos orzamentos cousas que non fago, e coloreo todo de azul”

Besteiro fixo un chamamento á mobilización, “un chamamento a todos os galegos que están convencidos de que Galicia necesita un cambio, para que camiñen con nós”

Nadia Calviño esíxelle ao goberno galego que explique que fixo cos 1.500 millóns de euros de fondos europeos transferidos dende o Estado

O candidato do PSdeG-PSOE á Presidencia da Xunta, José Ramón Gómez Besteiro, retou hoxe a Rueda para que convoque as eleccións autonómicas “cando queira e como queira porque os socialistas galegos estamos preparados para gobernar Galicia”.

Besteiro clausurou hoxe a Convención xunto coa vicepresidenta primeira do Goberno de España e ministra de Economía, Nadia Calviño; o secretario Xeral do PSOE galego, Valentín Formoso e o presidente da Mesa da Convención e alcalde de Vigo, Abel Caballero, que os socialistas galegos celebraron durante esta fin de semana na Cidade da Cultura para recoller as achegas ao documento marco do que sairá o programa electoral co que se presentarán ás vindeiras eleccións autonómicas de 2024.

Unha Convención que o tamén deputado nacional por Lugo, cualificou como un “éxito que é de todos e todas” porque logramos “un proxecto de primeira para un goberno de primeira”. E agradeceu a todos e todas as participantes nas ponencias: á militancia, aos profesionais independentes, as asociacións… polas importantes achegas ao programa electoral.

Besteiro afirmou que “somos o partido das solucións. Solucións para unha terra que está estancada, cun Goberno da Xunta instalado na inercia”. Referiuse aos retos da educación e da sociedade do coñecemento, aos desafíos da industria e a economía galega nun momento de transición enerxética desde a sustentabilidade e o respecto ao medio ambiente, a necesaria transformación do rural, da pesca, da cultura, da igualdade, dos servizos públicos como a Sanidade, a Educación, os Servizos Sociais ou a vivenda…

“Só cando gobernamos os socialistas, Galicia avanza” dixo “porque o programa que vén aplicando o Partido Popular desde a Xunta é o de recortar, pintar e colorear: recorto persoal, recorto atención, pinto nos orzamentos cousas que non fago, e coloreo todo de azul. Despois xa lle poñerá o lacito a TVG…”

Tamén agradeceu a presenza e o respaldo de Nadia Calviño, a quen felicitou polo seu nomeamento como a “primeira muller elixida presidenta do Banco Europeo de Inversiones (…) a galega que máis alto chegou na historia das institucións europeas  (…) e que supón o respaldo á política económica dos socialistas”.

Besteiro insistiu en que Galicia é una prioridade para os socialistas e mencionou algunhas das propostas que marcarán o futuro de Galicia nos vindeiros catro anos: completar o mapa de infraestruturas; priorizar a reindustrialización no marco de transición ecolóxica que coide e respecte o noso territorio; retomar a construción de vivenda pública ao ritmo do goberno de Touriño, que fixo máis en catro anos que Rueda e Feijóo xuntos na última década; recuperar vivenda baleira para poñela no mercado; “e deixar de separar cidade e rural, costa e interior como se foran países diferentes. Son dúas caras da mesma moeda, interdependentes, necesítanse aínda que teñan necesidades específicas. Non quero unha Galicia de dúas velocidades”, concluíu.

Canto a sanidade apostou polo seu reforzamento e aumento de persoal sanitario fronte a solución de Rueda que “é “sentidiño” e que non vaiamos ó hospital (…).Este é o presidente que ten hoxe Galicia”.

E chamou á mobilización das persoas que cren que Galicia é outra cousa: “Quérolles dicir que ese cambio é posible. Nós somos ese cambio posible”, fronte aos 19 anos de Partido Popular que se “queixan por todo e non fan nada”.

O candidato socialista a Xunta insistiu en facer persoalmente “un chamamento a todos os galegos que están convencidos de que Galicia necesita un cambio, para que camiñen con nós” e reiterou que “non me conformo con gobernar, quero gañar”. Para concluír que “ custoume moito chegar aquí… moito… pero aquí estou e aquí quero quedar!”

Nadia Calviño

A vicepresidenta primeira do goberno e Ministra de Economía, Nadia Calviño, deu o seu respaldo á candidatura de Besteiro para que o goberno galego teña un presidente socialista que “aposta polo diálogo e o traballo intenso e conxunto” e que traballe “man a man co goberno de España”. Calviño destacou o perfil do líder socialista e puxo en valor que renunciara a ser ministro para “estar aquí e loitar por sacar adiante á súa terra”.

Salientou a cúa capacidade de traballo “24 horas ao día, 7 días á semana para sacar adiante ao país”, que demostrou que leva “no corazón” o compromiso con Galicia es o “orgullo” de ser galego, que “non se avergoña como outros de falar galego no Congreso”. Aludiu a que Besteiro foi o primeiro en empregar o galego no Congreso no pasado mes de setembro no debate sobre o uso das linguas cooficiais ao que se negou o PP.

Dixo que é “unha persoa con visión de futuro” para encabezar a transición ecolóxica, e “con ambición” para situar a Galicia á cabeza do desenvolvemento económico de Galicia en colaboración co goberno central.

A ministra de Economía reclamoulle ao goberno galego que dea conta da xestión dos 1.500 millóns de euros europeos transferidos dende o Estado, que forman parte do total de 3.000 millóns para esta Comunidade Autónoma que conseguiu Pedro Sánchez. Lembrou que estes fondos teñen que ser destinados ao desenvolvemento das renovables, a infraestruturas, FP, educación infantil e apoio aos galegos e galegas.

Formoso

Calviño interveu logo do secretario xeral das Xuventudes Socialistas, Xurxo Doval, e o secretario xeral do PSdeG, Valentín González Formoso, que chamou á mobilización “ata o último recuncho e ata a última aldea” ata o fin do proceso electoral. Chamou a “ser responsables” para “facer que Galicia volva soñar” para apuntalar un cambio “máis posible que nunca” encabezado por Besteiro.