O voceiro do grupo parlamentario socialista acusa ao PP de crear unhas contas que benefician aos poderosos e esquece as familias galegas

Acusou a Rueda de manter unha política fiscal que favorece aos máis ricos, ao baixar os impostos ás grandes fortunas e deixar de ingresar 258 millóns de euros ao ano

Santiago de Compostela, 23 de outubro de 2024. O portavoz do Grupo Parlamentario dos Socialistas de Galicia, José Ramón Gómez Besteiro, denunciou hoxe na Sesión de Control no Parlamento que os Orzamentos 2025 presentados por Alfonso Rueda non dan resposta á grave crise da vivenda que sofre Galicia, onde 18.000 persoas están inscritas no rexistro público de demandantes de casa. Besteiro acusou ao presidente de priorizar os intereses das grandes construtoras e do sector privado, en lugar de impulsar políticas públicas que garantan o acceso á vivenda para os mozos e as familias galegas.

“Abandonan á mocidade ante un mercado de vivenda inasequible”

O portavoz socialista puxo o foco no que cualificou como “un dos maiores fracasos” dos orzamentos do 2025: a falta de solucións para o acceso á vivenda. “En Galicia hai 18.000 persoas que non atopan onde vivir e o seu goberno, señor Rueda, ofrece como única resposta liberalizar o solo e deixar o problema en mans das grandes construtoras”, advertiu Besteiro. Lembrou, ademais, que a Xunta reduciu o orzamento destinado á vivenda en 72 millóns de euros en comparación co goberno de Touriño, unha diminución que agrava a crise que xa sofren as familias galegas.

Besteiro criticou que, mentres os mozos galegos destinan máis do 50% dos seus salarios ao pago de alugueiros elevados, a incompetencia do goberno galego deixou sen bono alugueiro a moitas persoas que realmente o necesitan. “En vez de crear alternativas públicas e protexer aos nosos mozos e mozas, vostede opta por repetir os erros do pasado, poñendo os intereses das construtoras privadas por enriba das necesidades da xente”, subliñou o líder socialista.

Un goberno para concesionarias, enerxéticas e bancos

Besteiro foi contundente ao sinalar que os orzamentos de Rueda están deseñados para os privilexiados, sen ter en conta ás familias galegas que non poden acceder a unha vivenda ou que sofren os recortes nos servizos públicos. “Fálalle vostede aos que máis teñen: ás concesionarias das autoestradas, ás grandes fortunas, ás enerxéticas e aos bancos. Pero cala diante das dificultades que viven as familias traballadoras, os mozos que non atopan onde vivir, e os maiores que precisan coidadores”, denunciou.

O portavoz socialista tamén acusou a Rueda de manter unha política fiscal que favorece aos máis ricos, ao baixar os impostos ás grandes fortunas e deixar de ingresar 258 millóns de euros ao ano. “Mentres baixa impostos aos máis ricos, os galegos e galegas ven como se lles dispara o recibo do lixo e non teñen acceso a servizos sociais como a dependencia”, engadiu.

Galicia afogada pola débeda e os recortes en servizos públicos.

Outro dos puntos centrais da intervención de Besteiro foi a débeda crecente da Xunta, que no 2025 terá que pagar 1.763 millóns de euros aos bancos -porque non quere aceptar a quita que lle ofrece o Goberno de España-, unha cifra que supera o gasto en política social e sanidade. “Galicia paga máis aos bancos que a quen máis o necesita. Mentres se seguen destinando millóns ás concesionarias e aos intereses privados, os nosos servizos públicos sofren os recortes”, afirmou. Besteiro lembrou que a Xunta destina hoxe un 6% menos á dependencia, poñendo en risco o acceso aos coidadores e á atención a maiores.

Por último, o portavoz criticou a falta de aposta do goberno de Rueda polo uso e promoción do galego: o investimento en promoción da lingua se reduciu á metade en comparación co goberno de Touriño,  o que, dixo, “reflicte a falta de compromiso da Xunta coa preservación e fomento da lingua propia de Galicia”. Mentres se fala de patriotismo e identidade galega, continuou, “os feitos amosan que a Xunta abandona a nosa lingua, deixando de lado unha parte fundamental do noso patrimonio cultural”.

Propostas socialistas para resolver a crise da vivenda e impulsar o benestar social

José Ramón Gómez Besteiro concluíu a súa intervención ofrecendo unha serie de medidas para facer fronte á crise da vivenda e mellorar os orzamentos de 2025, que inclúen:

Un plan urxente para a vivenda pública, garantindo que as persoas e familias que o necesiten poidan acceder a fogares a prezos razoables

Apoio ao alugueiro para mozos e familias traballadoras, evitando que máis galegos queden excluídos dun dereito básico

Aumento do persoal para a valoración de dependencia e melloras nas condicións laborais para garantir un mellor servizo de coidadores

Melloras na sanidade pública, incrementando os recursos e atraendo máis profesionais

Impulso ás enerxías renovables, cun enfoque de colaboración público-privada que beneficie á sociedade galega

Fomento do I+D+i e apoio á creación de emprego de calidade para asegurar o futuro de Galicia

“Desde o PSdeG, imos traballar para que estes orzamentos non sexan os orzamentos dos privilexiados, senón uns orzamentos que devolvan a esperanza a esas 18.000 persoas que hoxe non atopan onde vivir, e a todos aqueles que necesitan uns servizos públicos dignos”, concluíu Besteiro.