Responsabiliza ao goberno galego do “caos” no inicio do curso con centros sen titores asignados e sen profesores de apoio

O líder dos socialistas galegos esíxelle a Rueda que asuma a gratuidade universal dos libros de texto e material escolar

Critica a “alianza PP-BNG” para “silenciar” ao PSdeG e limitar a súa capacidade de fiscalización ao goberno de Rueda

O portavoz do Grupo Socialista e secretario xeral do PSdeG, José Ramón Gómez Besteiro, acusou ao goberno galego de deixar sen apoio a milleiros de familias galegas diante do inicio do curso. O responsable socialista comezou a rolda de prensa de hoxe amosando o material escolar e o tique de gastos dunha familia con dúas fillas, que tivo que pagar 702 euros por libros de texto, sen contar o material escolar.

Esta é só unha dos milleiros de familias galegas, dixo, que teñen que facer “malabarismos” para pagar os máis de 600 euros por estudante que supón o inicio do curso mentres o PP segue a baixarlle impostos aos que máis teñen. Critica que o goberno galego descargue sobre as costas das familias este custe mentres as súas bonificacións fiscais para as familias máis ricas supoñen que deixarán de ingresar 685 millóns de euros de cartos públicos.

Sinalou que estas familias traballadoras están a ver como o goberno galego deixa de lado as políticas de apoio como a gratuidade dos libros de texto implementada baixo o goberno de Touriño. Gómez Besteiro aludiu á moción que levarán os socialistas mañá martes ao Pleno do Parlamento para reclamarlle ao goberno galego que recupere a gratuidade dos libros de texto e asuma o custe dos materiais curriculares obrigatorios no ensino obrigatorio.

O líder dos socialistas galegos denunciou a “descoordinación” e a “falla de previsión” no inicio do curso escolar por parte da Xunta. Lamentou que o “caos” volva a ser unha constante no curso escolar polo desleixo do goberno galego, con centros sen titores asignados nin profesores de apoio, e puxo como exemplo a protesta de mañá no Colexio Eloísa Ribadulla de Chantada.

Tamén fixo referencia ao incumprimento, por parte da Consellería de Educación, do acordo asinado con sindicatos educativos para fixar o número de alumnos por cada aula, que dixo que é “Marca PP: asinan acordos para non levalos a cabo”.

Alianza PP-BNG

O responsable socialista insistiu hoxe en denunciar a “alianza entre o PP e o BNG” no Parlamento galego co único obxectivo de “silenciar ao PSdeG e cercenar a súa capacidade de facerlle oposición ao goberno de Rueda”. Gómez Besteiro lamentou a “situación inédita” para retirarlle aos socialistas galegos unha das intervencións nas sesións de control ao presidente, que vai en contra do principio democrático da pluralidade.

Chamou a rectificar esta situación “extraordinariamente grave cuantitativa e cualitativamente”, que nunca se dera na historia do parlamentarismo galego, e que foi denunciada polos socialistas galegos ao comezo da Lexislatura nos órganos internos da Cámara, e tamén o pasado martes na Mesa e na Xunta de Portavoces. Logo do caso omiso feito por PP e BNG, levan agora a protesta á Mesa do Parlamento a través dun requirimento formal.

O portavoz do Grupo Socialista advertiu que “corremos o risco de que en próximas sesións de control non se nos permita interpelar ao presidente sobre temas de interese”, o que “afecta directamente ao dereito dos galegos e das galegas a unha fiscalización adecuada do seu goberno”.

Pregunta ao presidente: Hospital Álvaro Cunqueiro

O responsable socialista esixiralle ao presidente da Xunta unha explicación “medianamente crible” polo sobrecuste de 470 millóns de euros na construción do Hospital Álvaro Cunqueiro que vén de sinalar o Consello de Contas do que “alguén terá que facerse responsable”. Esixiulle ao goberno galego que “poña fin ás prácticas opacas e favoritismos” e “deixen de mirar para outro lado” mentres deixan sen explicar gastos millonarios de cartos públicos.

Esixiulle ao presidente da Xunta que explique “onde foron parar” centos de millóns de euros de diñeiro público, e que “non fagan o que pasou na Deputación Permanente” do Parlamento celebrada este verán, onde “ninguén veu dar explicacións, e o portavoz do PP falou de todo menos do sobrecuste” desta obra pública.

Anunciou que os socialistas galegos “seguiremos preguntando e denunciando estas irregularidades” porque “as prácticas opacas e o favoritismo non poden seguir marcando o rumbo de Galicia”.

En resposta aos preguntas dos socialistas, reclamou un modelo de financiamento “singular” para Galicia, que garanta a atención adecuada e uns servizos públicos de calidade para tódolos galegos e galegas “vivan onde vivan”. Dixo que é “fundamental” que a corresponsabilidade fiscal “debe formar parte deste debate”, mentres o PP “tende a esquecer este principio onde goberna”, cunha posición “errática e hipócrita” ao pedir máis recursos do Estado mentres quere rebaixar impostos.