O secretario xeral do PSdeG participou na manifestación contra Altri na Pobra e acusou ao PP de actuar como axente comercial dunha empresa privada, esquecendo os intereses de Galicia

O secretario xeral dos socialistas galegos, José Ramón Gómez Besteiro, participou este sábado na manifestación contra o proxecto de Altri na Pobra do Caramiñal, onde denunciou “a gran mentira de Altri e do Partido Popular” e acusou directamente ao presidente da Xunta, Alfonso Rueda, de “poñerse do lado da empresa e non da xente”.

Besteiro insistiu en que o proxecto “non é sostible desde ningún punto de vista: nin económico, nin medioambiental, nin social”. E lembrou que “desde o PSdeG sempre defendemos que a sustentabilidade real debe cumprir esas tres patas. E Altri, con todo o que sabemos na actualidade, coxea das tres”.

“Presentáronnos no ano 2021 unha suposta factoría de fibras bioecolóxicas e modernas, e o que temos agora enriba da mesa é unha macrocelulosa con numerosos condicionantes medioambientais e moitas sombras económicas e sociais”, explicou.

O líder socialista criticou que se pretenda financiar con fondos públicos un proxecto destas características: “Queren 250 millóns de euros de fondos europeos a fondo perdido. Diñeiro de todos os galegos e galegas para unha proposta que nin é innovadora nin serve ao interese do país”.

Tamén puxo o foco na “falsidade do impacto social prometido”. “Falaban de 2.500 empregos e agora escasamente chegan a 500”, indicou, sinalando que “o Partido Popular actuou como un verdadeiro axente comercial de Altri, esquecendo completamente a súa obriga de defender o interese público”.

Na súa intervención, Besteiro advertiu: “Non é un proxecto sostible, nin un proxecto de futuro. É simplemente unha gran mentira. E aínda estamos esperando que o señor Rueda nos explique por que considera estratéxico este proxecto para Galicia.”

A manifestación contou cunha ampla e nutrida representación de socialistas de toda Galicia, encabezada por José Ramón Gómez Besteiro, con participación de membros da Executiva, representantes das Xuventudes Socialistas, deputados e deputadas, así como numerosos alcaldes e alcaldesas, entre outros cargos.