O portavoz do Grupo Parlamentario Socialista denunciou que Rueda circula en dirección contraria a España e Europa: “A Xunta é opaca, a CRTVG é o medio público con máis denuncias en España por manipulación informativa, e Rueda perpetúa o peor de Feijóo”

Esta mañá, nun claro chamado á acción contra a desinformación, José Ramón Gómez Besteiro anunciou que o PSdeG esixirá no Parlamento Galego a mesma rexeneración democrática que se está impulsando en España e Europa. Esta iniciativa busca evitar que Galicia quede atrasada, unha vez máis, en termos de transparencia e democracia.

“Rueda ten que aprender de Pedro Sánchez e de Europa. Hoxe, o goberno de España, do mesmo xeito que xa se fixo na UE, presentou un plan moi ambicioso para rexenerar a democracia, frear as ‘fake news’ e asegurar que a cidadanía teña acceso a información veraz coa máxima transparencia, protección e pluralismo. Isto é todo o contrario ao que ocorre en Galicia”, afirmou Besteiro durante a súa intervención.

Na súa declaración, Besteiro criticou duramente a xestión do presidente da Xunta, Alfonso Rueda, indicando que “Rueda circula en dirección contraria a España e Europa. A Xunta é opaca, e a CRTVG é o medio público con máis denuncias en España por manipulación informativa. É dicir,  Rueda perpetúa as peores políticas de Feijóo, sen mostrar signos de cambio ou mellora.”

O grupo parlamentario encabezado por Besteiro está decidido a levar esta cuestión ao Parlamento Galego, demandando que se avance na rexeneración democrática, unha transformación que o Partido Socialista está impulsando noutros niveis de goberno, como fixo hoxe Pedro Sánchez no Congreso. “Esixiremos no Parlamento Galego a mesma rexeneración democrática que en España e Europa para non quedar á cola unha vez máis”, concluíu Besteiro.