O candidato do PSdeG á Presidencia da Xunta critica que o goberno do PP obrigase durante case un mes aos concellos a resolver o problema

Lembrou que  “todos temos na memoria como actúa o PP ante os desastres mediambientais na costa galega”, e insistiu en que Rueda “chega tarde na limpeza, na activación dos plans de emerxencias e na busca de responsables”

. José Ramón Gómez Besteiro, candidato do PSdeG á Presidencia da Xunta, acusou a Rueda de chegar “tarde mal e arrastro” ante as verteduras de pellets que afectan a varios puntos do litoral galego. “Pasaron 23 días desde que as nosas costas están cheas de plástico e 23 días nos que Rueda ficou desaparecido”, sinalou durante unha visita a unha praia do concello de Muros afectada pola contaminación.

Besteiro lamentou que “tivese que pasar case un mes para que a Xunta activase o seu plan de emerxencia para estas situacións” e incidiu en que “foron 23 días perdidos pola Xunta ante un feito de tal magnitude nos que se obrigou aos concellos a resolver o problema como poden e cos medios que poden”.

O tamén deputado por Lugo cargou contra “un Rueda que non entende a gravidade da situación” e alertou das consecuencias económicas e medioambientais que as verteduras terán nunhas rías que xa sofren unha perda importante da produción. Así, reclamoulle á Xunta de Galicia que asuma a “responsabilidade da limpeza máis inmediata e urxente” e no caso de  non son capaces, recordoulle a Rueda que ten á súa disposición empresa estatal TRAGSA para levar a cabo a limpeza de todos os areais afectados.

Nesta liña, Besteiro lembrou que “fronte a desidia da Xunta” o Goberno de España actuou dende primeiro minuto “con celeridade e dilixencia”, identificando o barco que perdeu a carga, monitorizando en alta mar a situación e asegurando a asunción de responsabilidade. Ao mesmo tempo, anunciou que se analizarán todas as posibles accións xudiciais tanto civís como penais “non só para as indemnizacións por mor dos custos de limpeza, senón de todos os danos medioambientais e socias que podan xerar”. “Xa está tardando a Xunta de Galicia en dar a mesma orde aos seus servizos xurídicos”, engadiu.

O candidato do PSdeG á presidencia da Xunta concluíu lembrando que  “todos temos na memoria como actúa o PP ante os desastres mediambientais na costa galega”, insistindo en que “chegan tarde na limpeza, tarde na activación dos plans de emerxencias, e tarde na busca de responsables”. Besteiro visitou unha praia afectada no concello de Muros acompañado de Pedro Blanco e da tenente de alcalde na localidade, Caridad González, así como dúas concelleiras socialistas.