Lamenta que o PP se negue elaborar un estudo sobre o resultado destes procesos en Oza-Cesuras e Cerdedo-Cotobade

A voceira de Orzamentos do Grupo Socialista, Begoña Rodríguez Rumbo, alertou hoxe de que as fusións municipais realizadas en Galicia non están a cumprir os obxectivos marcados pola Xunta. Malia que o goberno galego emprendeu estes procesos coa finalidade de facer unha xestión máis eficaz e eficiente dos recursos, mellorar a prestación de servizos e incrementar os ingresos, a deputada socialista evidenciou con datos que estes fins non se están acadar. “Unha mostra máis”, dixo, “de que o goberno da Xunta se basea na publicidade e propaganda”.

De feito, Begoña Rodríguez Rumbo advertiu que a realidade é que os maiores ingresos que están obtendo estes dous concellos “son a conta de recibir moitos máis recursos económicos da propia Xunta de Galicia”. A maiores, tampouco se cumpriu “o pretendido crecemento dos concellos resultantes, que con máis e mellores servizos reverterían o descenso demográfico e suporían unha oportunidade de vida, fundamentalmente para fixar a poboación máis nova”.

Por iso, Begoña Rodríguez Rumbo defendeu hoxe na Comisión de economía do Parlamento unha proposición non de lei na que se instaba á Xunta a elaborar estudos sobre os resultados acadados por estas dúas fusións e sobre as necesidades de financiamento municipal. Tamén se reclamaba, entre outras cuestións, un informe do Consello de Contas fiscalizando a situación económica dos municipios fusionados. Porén, o Partido Popular bloqueou estas solicitudes co seu voto en contra.

Tras reiterar que o PSdeG “nunca estivo en contra das fusión municipais”, Rodríguez Rumbo si lamentou as formas de levalas a cabo por parte do goberno galego. Así, confrontou a falta de consenso e democracia da Xunta con recentes exemplos como a fusión Don Benito e Villanueva de la Serena, en Extremadura, onde se realizou unha consulta popular.

A maiores, en Galicia as unións de municipios leváronse a cabo sen un estudo previo e sen ter en conta a opinión dos grupos da oposición. Ademais, Begoña Rodríguez Rumbo tamén fixo referencia a recentes entrevistas en medios de comunicación nas que os habitantes dos municipios fusionados en Galicia incidían en que non notaran cambios significativos.

De maneira específica, no referente á fixación de poboación, a deputada do PSdeG explicou que, lonxe de manterse ou medrar, houbo un descenso de habitantes tanto no municipio de Cerdedo-Cotobade (-352) como no de Oza-Cesuras (-165). Canto ao incremento de recursos, sinalou que ese aumento vén, de maneira exclusiva, dos fondos adicionais achegados pola Xunta a este dous municipios, con 13 millóns de euros nominais nos orzamentos galegos entre os anos 2016 e 2021.

A isto hai que sumarlle, ademais, a cantidade de convenios subscritos con estes dous municipios con todas as consellerías da Xunta e unha maior puntuación en todas as convocatorias de subvencións do goberno autonómico. En total, case 1,2 millóns de euros en acordos de colaboración “a dedo”.

En definitiva, Begoña Rodríguez Rumbo indicou que cada un destes concellos recibiu dende a fusión case 7 millóns de euros a maiores por parte da Xunta. Mentres, lamentou, para o conxunto dos municipios galegos, a través do Fondo de Cooperación Local, só reciben 113 millóns de euros, “un fondo que non se incrementou nin un só euro nos 12 anos do goberno Feijoo”.

Neste contexto, Begoña Rodríguez Rumbo reiterou que “os socialistas non cuestionamos as fusións”, senón o xeito de materializalas pola Xunta de Galicia. Nesta liña, cuestinou se estas fusións e o “sobrefinanciamento” realizado con cargo aos recursos da Comunidade autónoma e en detrimento do financiamento para o resto das administracións locais está a dar os resultados inicialmente marcados.