A portavoz de Industria do Grupo Socialista, Begoña Rodríguez Rumbo, acusou hoxe ao goberno galego de provocar unha “Lexislatura de barbecho industrial en Galicia” en plena crise pola descarbonización. Rodríguez Rumbo criticou que o goberno galego ten paralizado as súas iniciativas a favor da industria galega mentres se limita a “criticar por terra, mar e aire” ás iniciativas do goberno central.

A parlamentaria socialista realizou estas declaracións no debate dunha moción socialista presentada no Pleno do Parlamento na que lle afeou a paralización da Oficina Doing Business, anunciada en 2016 supostamente dedicada a fomentar a implantación de empresas en solo industrial, pero que logo de catro anos continúa conxelada. A proposta socialista, dirixida a reactivar esta ferramenta, foi rexeitada polo PP.

Rodríguez Rumbo lamentou que, durante toda unha Lexislatura, o único que fixera o goberno galego fora “anunciar o nacemento da iniciativa, sinalar as súas funcións, informar da dependencia orgánica, presentar unha Lei contendo o anuncio, pero en realidade non teñen feito nada”. Advertiu que mentres o goberno galego “nos conta contos”, o número de sociedades constituídas en Galicia reduciuse dende as 4.571 de 2016 a 4.062 en 2018 e apenas 2.850 no que vai de 2019.

Reprochoulle ademais á Xunta que por mor desta iniciativa teña obrigado aos concellos a modificar o seu réxime fiscal bonificando ás empresas, eliminando taxas ou reducindo prezos de solo empresarial a cambio de incluírse nun Censo de solo empresarial que teoricamente viña incluído nesta iniciativa pero que dous anos e medio despois de anuncialo segue sen poñer en marcha.

Begoña Rodríguez Rumbo resumiu neste sentido que “a Xunta conta contos mentres obriga aos concellos a facer contas” ofrecéndolles unha suposta discriminación positiva nas subvencións para obradoiros de emprego, apoio a parques empresariais, viveiros industriais e axudas ao emprendemento que nunca chegan.

A proposta socialista pedíalle á Xunta que publicara na web da Consellería de Industria o censo de solo industrial de Galicia, así como as propostas de actuación nos parques empresariais e os informes elaborados polo Observatorio de Solo Empresarial de Galicia. Tamén lle daba un prazo dun mes para facer públicos os polígonos industriais adheridos ao Plan de Banda Larga de Galicia.

Vulcano

A moción debatida hoxe incluía tamén pedirlle ao goberno galego que faga “tódalas actuacións necesarias” para impedir o cambio dos usos dos terreos de Vulcano, en réxime de concesión, logo de que o presidente da Autoridade Portuaria de Vigo, Enrique López Veiga, anunciara a súa intención de exercer o dereito de tanteo na subasta dos terreos.