O portavoz de Educación do Grupo Socialista, Luis Álvarez, reclamoulle hoxe á Consellería de Educación que poña en marcha o ciclo Formativo de grao medio Emerxencias e Protección Civil, habilitado no IES Plurilingüe Antón Losada Diéguez de A Estrada, o único de Galicia. Álvarez presentou unha pregunta oral en Comisión na que a Xunta eludiu confirmar se implantará o ciclo no próximo curso.

O responsable socialista criticou a “improvisación” demostrada polo goberno galego na xestión deste ciclo formativo, urxente dende a publicación, o 14 de decembro de 2018, do Real Decreto 1449/18 que establece o coeficiente redutor da idade de xubilación dos policías locais, cunha previsible falla de persoal en poucos anos. Advertiu que se trata dunha “realidade extraordinaria que debera dar lugar a unha previsión extraordinaria, ou cando menos cautelosa, seria e rigorosa”.

Álvarez lamentou que o goberno galego “non quere dar a coñecer a súa resposta” e obriga a agardar a xuño para “ver se o ciclo se pode implantar ou non”, xa que precisa dun “escenario concreto, particular, con instalacións específicas e profesorado especialista”. Por iso sinala a idoneidade da Estrada para albergar este ciclo, na mesma vila na que se atopa a sede da Axencia Galega de Emerxencias –Axega- e da Academia Galega de Seguridade Pública.

O mesmo escenario

Advertiu que o goberno galego repite o mesmo escenario do curso 19-20, cando a pesares de que o dito ciclo formativo se incluía na oferta do IES da Estrada, non había ningunha praza adxudicada na lista feita pública o 16 de xullo de 2019. Luis Álvarez alerta de que “nos atopamos exactamente na mesma realidade, pero co agravante de que contan coa experiencia de non poder poñer a funcionar un ciclo previsto na orde de oferta de ensinanzas de FP” no curso anterior.