Patricia Iglesias acusa ao goberno galego de converter os principios e as regulacións de transparencia e boas prácticas en “papel mollado”

A portavoz de Transparencia do Grupo Socialista, Patricia Iglesias, afeoulle hoxe ao goberno galego que teña agochada a documentación da autorización da fichaxe da que fora directora da Axencia Galega de Innovación -Gain- pola mesma empresa á que lle concedera un contrato de 21,6 millóns de euros 4 días antes de deixar a Xunta. Así o dixo no debate dunha pregunta en Comisión sobre o incumprimento da normativa que regula os conflitos de intereses nos altos cargos do goberno.

Iglesias acusou ao goberno galego de converter en papel mollado” toda a normativa que regula a aplicación dos principios de transparencia e boas prácticas por parte do goberno galego, que anuncia políticas de integridade e prevención da corrupción que “non aplican na práctica do día a día”.

Puxo como exemplo o caso da ex directora da GAIN, que fichou por unha compañía para o desenvolvemento de vehículos non tripulados en xuño de 2024, dous meses despois de adxudicarlles un contrato de 21,6 millóns de euros. Lembrou que a Lei de Transparencia e Bo Goberno de Galicia sinala no artigo 45.1 que os altos cargos deberán agardar dous anos logo de saír da Xunta antes de prestar servizos nas entidades relacionadas con expedientes sobre os que ditaran resolucións.

Iglesias advertiu que o portal web da Xunta inclúe ata 7 resolucións de incompatibilidades, pero a motivación que xustificou a compatibilidade do contrato desta ex alto cargo “non aparece por ningún lado”. Criticou que o goberno galego “sempre opte pola opacidade e a falta de transparencia e aquí non pasa nada”.

A parlamentaria socialista advertiu que “isto vai de integridade e de bo goberno, dunha política honesta e limpa e de facer o correcto cando ninguén te está vixiando e de xestionar de forma eficiente os conflitos de intereses sen favoritismos, non dun xogo de trileiros”.

Sinalou que Galicia está “á cola” das comunidades autónomas na regulación efectiva dos conflitos de intereses, regulación de lobbies e transparencia efectiva. Explicou neste sentido que o 40 por cento do diñeiro público destinado a contratos por parte do goberno galego -que superan os 800 millóns de euros- son concedidos “a dedo”, incluíndo adxudicacións millonarias a empresas nas que coinciden vencellos familiares e persoais de altos cargos do PP e do goberno galego.

Esixiulle ao goberno galego que impulse a política de integridade institucional para garantir unha conduta “exemplar” dos responsables políticos e a coordinar, impulsar e colaborar na elaboración e actuación dos plans de prevención de riscos de xestión, medidas antifraude e medidas contra a corrupción.