Silvia Longueira critica a escasa ambición da Lei de Cultura Inclusiva da Xunta, un “texto inocuo” concibido para “cubrir un expediente débil e inconciso”

A portavoz de Cultura e Lingua do Grupo Socialista, Silvia Longueira, dixo hoxe que a dimisión do coordinador de cultura do PPdeG, coñecida esta mañá, constitúe “un bo exemplo de como a relación tóxica que mantén o PP co galego chega a ofender até os seus”. Longueira fixo estas valoracións logo de intervir no Pleno do Parlamento no debate da lei de Cultura Inclusiva da Xunta, que foi aprobada co único voto a favor do PP e na que os socialistas se abstiveron.

Longueira sinalou que o abandono do cargo do responsable de Cultura do PP “alerta sobre a falla de entendemento e de rumbo respecto á política lingüística dentro do seu propio partido”, e constitúe “unha mostra dos moitos concelleiros e alcaldes do PP que están en contra da política lingüística que executou o PP durante estes 15 anos”.

Salienta que esta dimisión se teña producido precisamente logo da concentración masiva do pasado domingo 18 en Santiago de Compostela, “na que milleiros de persoas reclamamos un compromiso real coa lingua”. A responsable socialista apunta que os socialistas galegos “esiximos un cambio de rumbo” no que se tome á lingua galega “como parte do patrimonio cultural galego, que precisa dunha especial protección e difusión, imprescindible para manter a nosa identidade”.

Lei de Cultura Inclusiva

Silvia Longueira criticou hoxe a falta de ambición da Lei de Cultura Inclusiva da Xunta de Galicia, que foi aprobada no Parlamento coa abstención dos socialistas galegos por que se trata dun “texto inocuo” concibido para “cubrir un expediente débil e inconciso”. Longueira lamentou a falla de concreción normativa e mecanismos de implementación da norma, aprobada sen asignación orzamentaria.

A responsable socialista lamentou a falla de diálogo coa sociedade civil para a elaboración desta norma, que foi elaborada sen contar coas aportacións sinaladamente do sector cultural, que “vai moi por diante e que xa ten un corpus construído, e que precisa ser escoitada para regular e construír solucións de futuro”. Longueira explicou que o texto foi aprobado incorporando tan só tres transaccións das mais de dúas ducias de emendas presentadas polos socialistas galegos.

Criticou que a falla de atención do goberno galgo ás necesidades reais dos creadores, colectivos e institucións derivou nun “texto inocuo”, con importantes eivas que o reducen a unha “declaración de intencións”. Advertiu que a norma nace sen incorporar un Plan Estratéxico de Cultura Galega que garanta o afianzamento e seguridade económica dun sector cultural “precarizado, e en moitas ocasións atomizado”.

Carencias

Longueira lamentou que a norma nace con “carencias na perspectiva tecnolóxica e dixital”, que carece das ferramentas necesarias para garantir a accesibilidade e a inclusión na era da Intelixencia Dixital. Apunta que malia que recoñece a fenda dixital, carece de solucións estruturais como a dotación de dispositivos ou formación tecnolóxica adoptada para colectivos vulnerables.

Os socialistas galegos reclamaron unha asignación orzamentaria explícita, un calendario de implementación con obxectivos específicos e medibles para a eliminación de barreiras e a promoción da accesibilidade universal. Tamén reclamaron o reforzo da perspectiva dixital, ampliar a participación dos colectivos vulnerables ou establecer un consello consultivo permanente de axentes culturais e colectivos sociais para asesorar sobre a implementación e seguimento da Lei.