O secretario xeral do PSdeG destacou o compromiso dos socialistas co dereito á vivenda: “Galicia necesita un cambio urxente nas súas políticas públicas. Non podemos aceptar que vivir dignamente sexa un luxo”

A ex-ministra de Vivenda de Portugal, Marina Gonçalves; o conselleiro de Vivenda do País Vasco, Denis Itxasu, e a conselleira de Territorio e Vivenda de Cataluña, Silvia Paneque, participaron na xornada celebrada no Auditorio de Vialagarcía

Os “Diálogos con Raíz” continúan percorrendo toda Galicia demostrando a vontade dos socialistas de escoitar e actuar sobre as preocupacións da cidadanía

Os socialistas galegos intensifican o seu compromiso coa cidadanía a través dunha nova xornada dos “Diálogos con Raíz”, unha iniciativa destinada a debater e propoñer solucións a cuestións que afectan directamente a vida das persoas. Nesta ocasión, o encontro celebrouse en Vilagarcía de Arousa, un dos puntos onde a crise da vivenda manifesta con maior intensidade os seus efectos. José Ramón Gómez Besteiro, secretario xeral dos socialistas galegos, subliñou que “a vivenda é un dereito fundamental, e o noso deber é garantir que as políticas públicas estean á altura dun desafío tan grave como este”.

Na súa intervención ao remate da xornada, que contou con destacados invitados como o conselleiro de Vivenda do País Vasco, Denis Itxasu;  a conselleira de Cataluña Silvia Paneque, a ex ministra de Vivenda de Portugal, Besteiro lamentou que Galicia afronta un mercado de alugueiro roto, que non pode solucionarse con parches, cunha suba interanual dos prezos que en Vilagarcía alcanzou o 25%, a máis alta de Galicia.

“Esta situación, continuou, agrávase pola proliferación descontrolada de vivendas turísticas, que expulsa aos veciños dos seus barrios en cidades como Santiago de Compostela”. Besteiro criticou a falta de acción do goberno autonómico, lembrando que, desde o ano 2009, só se construíron 6.313 vivendas públicas, fronte ás 7.241 impulsadas en catro anos polo goberno de Emilio Pérez Touriño. 

“Non podemos permitirnos que un problema tan serio como o acceso á vivenda sexa ignorado ou tratado con parches insuficientes que non benefician realmente á cidadanía”, advertiu.Para facer fronte a esta crise, os socialistas propoñen un plan integral baseado na construción de vivendas públicas que permanezan no mercado como un ben común, evitando calquera intento de especulación.

Besteiro destacou que é imprescindible “aumentar a oferta de vivendas de alugueiro, pero facelo desde unha perspectiva pública e sostible, garantindo que as familias e a mocidade teñan acceso real a un fogar digno”.

A rehabilitación de vivendas baleiras é outro eixo central da proposta do PSdeG. Neste sentido, Gómez Besteiro sinalou a necesidade de poñer estas propiedades en condicións óptimas para o mercado, resolvendo un problema estrutural que afecta tanto ás cidades como ás zonas máis despoboadas. Ademais, subliñou a importancia de axilizar a declaración de zonas tensionadas, medida bloqueada polo goberno galego, que dificulta a aplicación das disposicións da Lei de Vivenda estatal. “Non é tolerable que se poñan atrancos cando se trata de protexer ás persoas fronte ao abuso dos prezos de mercado”, afirmou.

Un dos elementos máis innovadores das propostas socialistas é a creación dun Banco Público de Alugueiro. Inspirado en iniciativas exitosas de Portugal e Euskadi, este sistema permitiría á Xunta actuar como mediadora entre propietarios e inquilinos, garantindo prezos accesibles e estabilidade no mercado. Besteiro explicou que este modelo suporía “un cambio real no acceso á vivenda, priorizando ás familias con máis necesidades e asegurando que os propietarios teñan todas as garantías, incluído o mantemento das vivendas e o pago asegurado”. Esta iniciativa, ademais, contribuiría a reducir a relación directa entre propietarios e inquilinos, freando prácticas irregulares que dificultan o acceso ao alugueiro.

As críticas á xestión do goberno autonómico non faltaron durante o encontro. Besteiro lamentou que a Xunta insista en políticas que non solucionan os problemas reais. Exemplos diso son a promoción de vivendas de 30 metros cadrados para menores de 36 anos ou a habilitación de baixos comerciais como vivendas, medidas cualificadas polos socialistas como “parches de baixa calidade” que ignoran as demandas da cidadanía. Tamén denunciou que os recursos destinados á vivenda para 2025 seguen sendo insuficientes, cun orzamento que, actualizado ao IPC, está 72 millóns por debaixo do último exercicio dun goberno socialista.

Os “Diálogos con Raíz”, que continúan percorrendo toda Galicia, demostran a vontade dos socialistas de escoitar e actuar sobre as preocupacións da cidadanía. Besteiro concluíu reafirmando o compromiso do PSdeG-PSOE co dereito á vivenda: “Galicia necesita un cambio urxente nas súas políticas públicas. Non podemos aceptar que vivir dignamente sexa un luxo. Nós estamos aquí para asegurar que o dereito á vivenda se cumpra, con propostas reais e medidas efectivas que devolvan a esperanza á xente.”