Aitor Bouza criticou durante a manifestación pola vivenda desta mañá en Santiago que no 2024 o PP “meteu nun caixón 42 millóns de euros” que estaban destinados a  un programa clave para axudar á cidadanía a dispoñer dun fogar 

O secretario de Acción Territorial valorou que o goberno socialista da Coruña vén de solicitar a primeira declaración de zona residencial tensionada en Galicia reclamoulle á Xunta que a tramite con axilidade “e que non poña trabas burocráticas nin políticas”

O secretario de Acción Territorial do PSdeG, Aitor Bouza, denunciou hoxe en Santiago que o pasado ano o Goberno de Rueda deixou sen gastar 7 de cada 10 destinados a políticas de acceso á vivenda. “Vimos de coñecelo esta mesma semana a través dos propios datos oficiais da Xunta de Galicia”, explicou Bouza, criticou que, dese xeito, o PP “meteu nun caixón 42 millóns de euros”. É dicir, executou só un 30 % do que figuraba nos Orzamentos. “Iso demostra que a política do Partido Popular en materia de vivenda é simplemente fume”, afirmou.

Aitor Bouza fixo esas declaracións durante a manifestación pola vivenda que tivo lugar en Santiago de Compostela, nunha convocatoria que se reproduciu en diferentes cidades de todo o país. Alí recordou que se trata dun dereito fundamental que desde o Partido Socialista “defendemos con uñas e dentes, pero, sobre todo, con políticas claras”, e demandou que a Xunta de Galicia rectifique e se comprometa do mesmo xeito.

“O Goberno galego ten que investir todos os fondos destinados ao acceso á vivenda, un programa clave”, dixo o secretario de Acción Territorial, que lle reprochou ao Executivo autonómico que poña en práctica “unha política de fotos e non para garantir realmente dereitos básicos coma este”.

Bouza mostrou a súa satisfacción por que A Coruña veña de solicitar a declaración de zona residencial tensionada, unha figura “que levamos defendendo durante o último ano e medio”, dixo, e que á que lle outorgou “vital importancia”. “Un concello socialista, liderado pola alcaldesa Inés Rey, foi o primeiro en toda Galicia en formalizar esa petición”, valorou, para a continuación reclamarlle ao Goberno galego “que non poña trabas nin burocráticas, nin administrativas, nin políticas” e esixirlle, ademais, “axilidade” no procedemento. Nese senso, censurou que o proceso xa se dilatou abondo  “por culpa dos trámites que impuxo a Xunta a través da súa propia normativa”.

Banco público de alugueiro

O secretario socialista de Acción Territorial reivindicou a declaración de zonas tensionadas, impulsada polo Goberno de Pedro Sánchez, como unha medida que vai permitir “garantir o dereito de acceso a un fogar a moitos galegos e galegas que precisan dunha acción política para poder vivir con dignidade”.

Sinalou tamén que desde o propio PSdeG se están a reivindicar, ao mesmo tempo, outras iniciativas que teñen como obxectivo favorecer ese acceso á vivenda. En concreto, referiuse á proposta dun banco público de alugueiro, lanzada polo secretario xeral, José Ramón Gómez Besteiro. Trátase dunha medida que a Xunta pode desenvolver con reducidos recursos públicos e que permitiría “controlar realmente o mercado para garantir, por unha banda, seguridade xurídica, e por outra, un dereito básico”.