Silvia Longueira alerta de que o número de dependentes aumentará na próxima década en Galicia ata cifras “para as que o sistema non conta con ningunha previsión”

Esixe condicións laborais dignas para o persoal coidador das persoas dependentes en Galicia

A portavoz de Política Social do Grupo Socialista, Silvia Longueira, reclamoulle ao goberno galego que defina o modelo de residencias de maiores para os próximos 8 anos e que garanta as condicións de formación, remuneración e dereitos do persoal que se encarga dos coidados das persoas maiores e dos dependentes. Longueira presentará unha moción no primeiro Pleno do ano para reclamarlle ao goberno galego que tome medidas urxentes para evitar o colapso da atención á Dependencia en Galicia.

A responsable socialista advirte que o sistema “non conta con ningunha previsión” para atender á emerxencia demográfica de Galicia, que anticipa o incremento dos dependentes previsto para os próximos oito anos nunha poboación que conta neste momento con máis de 400.000 galegos e galegas entre os 55 e 64 anos. Reclamoulle ao goberno galego que poña en marcha tódolos seus recursos e competencias dispoñibles para afrontar un dos principais retos da próxima década.

Lembrou que aínda teñen pendente o deseño e aplicación do Plan Estratéxico de Servizos Sociais previsto na Lei 13/2008 dos Servizos Sociais de Galicia. Así o dixo logo de coñecer o informe da Asociación de Directoras e Xerentes de Servizos Sociais, que apunta que Galicia é a cuarta Comunidade Autónoma con máis déficit de prazas de residencias, e precisa de 13.850 novas prazas para chegar á ratio de 5 por cada 100 maiores de 65 anos.

Ademais, urxiulle a definir o modelo de residencias para o horizonte inmediato, tendo en conta o envellecemento previsto da poboación e as diferentes casuísticas de enfermidades neurodexenerativas, doenzas psiquiátricas e infraestruturas de proximidade para os usuarios e usuarias previstos. Reclamoulles que incorporen as recomendacións técnicas e tamén as aportacións das plataformas cidadás que piden residencias de proximidade máis pequenas.

Longueira esixiulle ao goberno galego un plan de choque para garantir as condicións laborais do persoal auxiliar de residencias, de axuda no fogar e dos familiares ou coidadores con persoas dependentes a cargo para superar a precariedade e a falla de soporte deste colectivo. Propón incorporar as demandas destas traballadoras e traballadores a través dun novo convenio colectivo que supere a súa situación de vulnerabilidade.

Reclamou ademais incorporar aos orzamentos da Xunta a previsión das necesidades de mantemento das residencias de maiores que dependen do goberno galego e que levan os últimos dous anos en situación de abandono, afrontando serias deficiencias de material mecánico e infraestruturas.

Finalmente, empraza á Consellería de Política Social a acometer controis de inspección en regra e con garantías nas residencias e centros de día de Galicia, informando cada 3 meses para que sexan recollidos nun informe anual que garanta as actuacións, melloras, propostas ou deficiencias dos mesmos.

Longueira empraza así ao goberno galego a tomar medidas para superar a difícil situación dos dependentes galegos derivada da xestión deficiente do goberno galego, con esperas de ata dous anos para acadar unha resolución.

Dixo que esta cifra resulta “intolerable” cando “en torno a 400 galegos e galegas faleceron” nos últimos anos mentres agardaban polo seu dereito, e reclamou “solucións reais e inmediatas” para rebaixar “unhas listas de espera que non deixan de medrar” e uns profesionais “ao límite”.