“Parece que lles molesta que falemos nesta Cámara”, denunciou a deputada do PSdeG, que dixo alegrarse de que o presidente puidese escoitar mentres abandonaba o hemiciclo

A parlamentaria socialista trasladou desde a tribuna unha pregunta da ANPA do colexio Bergantiños, de Carballo, sobre a grave situación que padece o centro educativo

“Señor Rueda, pode explicarlles vostede ás familias dos nenos e nenas do CEIP Bergantiños, de Carballo, igual que aos de outros 300 centros educativos de Galicia que teñen o mesmo problema, por que non teñen persoal suficiente para cubrir as súas necesidades educativas especiais?”. Foi a pregunta a deputada socialista Lara Méndez trasladou desde a tribuna do Parlamento esta mañá mentres o presidente da Xunta abandonaba o hemiciclo sen dar resposta sobre un problema no que a comunidade educativa insistiu nos últimos días.

Mendez criticou que os grupos de PP e BNG acordaran, “sorprendentemente”, que os socialistas non puidesen participar na sesión de control ao Goberno de hoxe “porque era demasiado perder 11 minutos” para poder debater unha pregunta máis. “Esa é a realidade”, remarcou. Cando menos, “alégrome de que a escoitara”, ironizou.

A parlamentaria do PSdeG inquiriu aos populares se “están moi preocupados” por que o Grupo Socialista poida fiscalizar o labor do Executivo e invitounos a reflexionar cun exemplo. “Cando comecei como alcaldesa de Lugo, eramos seis grupos políticos na corporación, cinco deles na oposición, e todos tiñan o mesmo tempo e a mesma posibilidade de debater, tiveran un concelleiro ou nove”, explicou.

“Parece que lles molesta moito que falemos nesta Cámara e que preguntemos ao presidente. En todo caso, presidente, a ver se nos dá resposta. Válenos vía telemática, por escrito ou na seguinte sesión plenaria”, díxolle Lara Méndez a Rueda.

A necesidade urxente de dispor dun segundo orientador

Tal como denunciou o pasado luns o secretario xeral do PSdeG e portavoz parlamentario, José Ramón Gómez Besteiro, o CEIP Bergantiños vive unha grave situación, xa que carece de profesionais suficientes para atender aos alumnos que precisan apoio específico, máis do 40 % dos 575 rapaces e rapazas que cursan estudos no centro. 

Desde a ANPA levan reclamando dende hai case un mes a incorporación dun segundo orientador ou orientadora para atender á alta carga de valoracións pendentes, un aumento do profesorado para compensar a redución de 100 horas lectivas sufrida este curso e a creación dun Grupo de Adquisición de Linguas, fundamental para atender ao aumento de estudantes con dificultades idiomáticas. Ademais, solicitan a inclusión do centro no programa PROA+, indispensable para o reforzo educativo e rexeitado inxustificadamente pola Xunta.

Besteiro advertiu que non se trata dun caso illado, senón dun problema estrutural que afecta a preto de 300 centros en toda Galicia, nos que se incumpren de forma sistemática as ratios e as dotacións de apoio necesarias. Centros como o CEIP As Fontiñas de Santiago de Compostela, o CEIP Arcediago en Santiso, ou o IES Francisco Aguiar en Betanzos son só algúns exemplos da redución de especialistas en pedagoxía terapéutica e audición e linguaxe, deixando sen atención adecuada ao alumnado con necesidades educativas especiais.