O líder socialista denunciou a situación que vive o alumnado do CEIP Bergantiños, onde se reuniu cos pais e nais que levan protestando dende o 28 de novembro sen resposta por parte de a Xunta

Besteiro denunciou que o de Carballo non é un caso illado, senón un problema estrutural que afecta preto de 300 centros en toda Galicia, nos que se incumpren de forma sistemática as ratios e as dotacións de apoio necesarias

Respecto a  Altri , o voceiro lembrou que a empresa reclamou 250 millóns de euros de fondos públicos a fondo perdido para garantir a viabilidade do proxecto, “o que nos supón serias dúbidas sobre a súa sustentabilidade económica”

O voceiro do Grupo Parlamentario Socialista, José Ramón Gómez Besteiro, compareceu esta mañá en rolda de prensa para trasladar aos medios de comunicación a pregunta que non se lle permitiu formular ao presidente da Xunta no Parlamento por unha manobra pactada entre o PP e o BNG, que negaron aos socialistas a posibilidade de exercer a súa función de control ao Goberno “por evitar que Rueda comparecese 11 minutos máis nun pleno de cada período de sesións -un cada seis meses-“.

“Non nos van calar. Como non se nos permitiu formular esta pregunta no hemiciclo, trasladámola aquí, nesta rolda de prensa, porque é unha cuestión fundamental para as nais e pais do CEIP Bergantiños de Carballo e, en definitiva, para toda Galicia. Nós seguimos sendo a voz da Galicia real”, declarou Gómez Besteiro.

A pregunta que hoxe formulou o Grupo Socialista en nome das familias do CEIP Bergantiños refírese á grave situación deste centro educativo de Carballo, onde máis do 40% dos 575 alumnos precisa apoio educativo específico. Dende o pasado 28 de novembro, as familias protestan diante do colexio reclamando recursos e solucións inmediatas sen éxito. “A Xunta permanece allea a unha situación que afecta directamente ao futuro destes rapaces e rapazas, comprometendo o seu desenvolvemento académico, social e emocional”, explicou Besteiro.

O líder socialista denunciou que esta situación non é un caso illado, senón un problema estrutural que afecta preto de 300 centros en toda Galicia, nos que se incumpre  de forma sistemática as ratios e as dotacións de apoio necesarias. Centros como o CEIP As Fontiñas de Santiago de Compostela, o CEIP Arcediago en Santiso, ou o IES Francisco Aguiar en Betanzos sofren a redución de especialistas en pedagoxía terapéutica e audición e linguaxe, deixando sen atención adecuada ao alumnado con necesidades educativas especiais. “Este é un exemplo máis da desleixo da Xunta de Galicia, que non só non resolve os problemas, senón que os agrava coa súa inacción”, sentenciou.

O proxecto de Altri: preguntas sen resposta

Durante a rolda de prensa, Gómez Besteiro tamén abordou a cuestión do proxecto de Altri, unha das grandes incógnitas sobre a política industrial da Xunta. O voceiro lembrou que a empresa reclamou 250 millóns de euros de fondos públicos a fondo perdido para garantir a viabilidade do proxecto, “o que nos supón serias dúbidas sobre a súa sustentabilidade económica”.

“Levo meses preguntando se este proxecto é realmente viable ou só o será se se paga cos cartos de todos os galegos e galegas. Teño a crenza de que eses fondos extraordinarios non van chegar, e iso evidencia aínda máis as dúbidas sobre a viabilidade real deste proxecto. Se precisa un 25% de financiamento público a fondo perdido, estamos ante algo que cheira a chamusquina”, afirmou.

Gómez Besteiro destacou que este proxecto, que inicialmente foi presentado como un modelo de innovación e sustentabilidade, debe ser sometido a un exame rigoroso, especialmente se se financia con recursos públicos. “Os representantes do pobo galego teñen dereito a coñecer cal é o plan do Goberno para asegurar que os recursos públicos se invistan de forma eficiente e responsable”, engadiu.

Compromiso coas prioridades da cidadanía

No que respecta a enquisa de Sondaxe, Gómez Besteiro reiterou que o PSdeG continuará sendo a voz das galegas e galegos, especialmente en temas que afectan directamente a súa calidade de vida, como a educación pública, a sanidade, o emprego e a vivenda. “Non imos permitir que as necesidades reais da nosa xente sexan ignoradas. Seguiremos esixindo solucións e defendendo un futuro mellor para Galicia”, concluíu.