Silvia Longueira advirte que a ELA “non entende de ideoloxías nin de cores políticas” e reclama “unidade” na resposta política en apoio ás persoas afectadas

A portavoz de Política Social do Grupo Socialista, Silvia Longueira, lamentou hoxe que o PP preferira romper coa unidade fronte á ELA que dar un apoio “sen reservas” ás peticións das persoas afectadas por esta enfermidade en Galicia. Longueira presentou unha proposición non de Lei no Pleno do Parlamento que o PP rexeitou para evitar poñerlle deberes ao goberno galego.

A responsable socialista ofreceuse a chegar a un acordo co PP, pero aqueles non aceptaron que a proposta pedira axilizar ao máximo a tramitación do Plan de Atención Individualizada e urxirlle ao goberno galego que procedera de oficio á revisión de grao. Tamén reclamaba a mellora das condicións laborais dos coidadores e coidadoras e incrementar o orzamento público sobre a investigación desta enfermidade e as súas consecuencias, como sinala a Lei ELA.

Longueira explicou que a proposta responde ao compromiso dos socialistas galegos cos representantes de Agaela incluíndo “uns puntos mínimos aos que non podemos renunciar”, e reclamoulle ata o último momento ao PP que demostrara que o Parlamento “está á altura dos retos que enfronta Galicia”. Explicou que a enfermidade “non entende de ideoloxías nin de cores políticas” e esixe responder con unidade fronte ao sufrimento das persoas afectadas e das súas familias.

A parlamentaria socialista reclamoulle hoxe ao goberno galego que incluíra nos Orzamentos do próximo ano unha partida orzamentaria suficiente para darlles resposta aos 350 afectados de ELA en Galicia. Tamén pedía formar e estruturar a atención socio sanitaria especializada para enfermos de ELA, que precisan de técnicas e tecnoloxía específicas, así como reducir a carga burocrática para atender aos doentes.

Os socialistas galegos levaron ao Parlamento as peticións dos afectados por esta enfermidade, que piden seguimento trimestral, atención psicolóxica e acceso á rehabilitación durante tódalas fases da doenza, ademais de incorporar á carteira de servizos o dispositivo ou tablet e brazo articulado, ademais de lector ocular.

Silvia Longueira explicou que a Lei ELA, aprobada o pasado mes de outubro no Congreso dos Deputados, supón un paso histórico na atención a estas persoas, constituíndo un piar fundamental para eles e as súas familias, e fixa responsabilidades para Galicia, que pasan polo desenvolvemento da norma e garantir que non quede no papel.

A responsable socialista explicou que os socialistas galegos farán un seguimento rigoroso da aplicación da Lei en Galicia e a mobilización de recursos para que ningún galego ou galega con ELA quede sen a axuda que necesita.