Paloma Castro acusa á Xunta de “ignorar o impacto ambiental das súas políticas e excluír mecanismos de control mentres Galicia xa afronta os efectos da crise climática”

A  portavoz de Medio Ambiente do Grupo Socialista, Paloma Castro, alertou hoxe da necesidade urxente de reactivar o Observatorio Galego da Biodiversidade. Castro presentou unha pregunta na Comisión de Medio Ambiente do Parlamento na que se referiu aos eventos climáticos extremos como os de Valencia, xa que “son un recordatorio da gravidade da crise climática e da necesidade de accións inmediatas e coordinadas”.

“Nun contexto de cambio climático onde os ecosistemas están ao bordo do colapso, é inadmisible que a Xunta eluda a fiscalización ambiental en decisións de grande impacto. Galicia necesita órganos como o Observatorio Galego da Biodiversidade para garantir a transparencia e a efectividade das súas políticas medioambientais,” destacou Castro.

A responsable socialista denunciou que a Xunta intenta reducir o control sobre proxectos ambientais críticos, a través de cambios normativos que substitúen os informes preceptivos do Consello Galego de Medio Ambiente por simples notificacións.

“O cambio climático esixe responsabilidade e colaboración, non políticas de opacidade e exclusión”

Castro subliñou que o abandono do Observatorio Galego da Biodiversidade, que debería reunir expertos, universidades e organizacións ecoloxistas, reflicte a falta de compromiso do goberno autonómico coa protección ambiental.

Subliñou ademais que o Observatorio, creado para reunir expertos, asociacións ecoloxistas e universidades, é esencial para garantir unha visión multidisciplinar na toma de decisións ambientais. Paloma Castro fixo fincapé en que a súa inactividade actual é froito dunha estratexia de descoido intencionado por parte da Xunta, que reduce ano tras ano o orzamento en medio ambiente –de 295 millóns de euros en 2009 a tan só 22 millóns na actualidade.

“A falta de supervisión e a exclusión dos colectivos ecoloxistas nas políticas medioambientais de Galicia é unha mostra máis do abandono do noso patrimonio natural por parte do goberno da Xunta,” engadiu a deputada. Castro resaltou que o PSdeG-PSOE seguirá esixindo o cumprimento das normativas en conservación e a participación activa das organizacións especializadas para asegurar que o desenvolvemento económico non vaia en detrimento da biodiversidade galega.

“Non podemos permitir que Galicia quede atrás nun momento tan crítico para o planeta. Os efectos do cambio climático, como as secas e as inundacións, afectan directamente á nosa biodiversidade e á calidade de vida das galegas e galegos,” engadiu Castro. A deputada concluíu afirmando que o PSdeG-PSOE seguirá esixindo a recuperación de mecanismos que aseguren políticas públicas responsables, na procura dun equilibrio entre o desenvolvemento económico e a preservación do patrimonio natural galego.