Silvia Longueira reclama que garantan coidadores formados e especializados na atención desta enfermidade, máis recursos para garantir a calidade de vida dos afectados e incremento nas liñas de investigación da enfermidade

A portavoz de Política Social do Grupo Socialista, Silvia Longueira, reclamoulle hoxe á Xunta que incorpore nos Orzamentos para o ano 2025 unha partida específica para darlle resposta ás noves necesidades dos 350 afectados por ELA en Galicia. Longueira mantivo un encontro con Agaela no que tamén participou o portavoz do Grupo Socialista, José Ramón Gómez Besteiro, para analizar a Lei aprobada recentemente no Congreso e recoller as demandas das persoas afectadas por esta enfermidade.

A responsable socialista reclamoulle ao goberno galego que aproveite o novo escenario aberto pola norma estatal para reforzar as partidas orzamentarias nas áreas de emprego, Servizos Sociais e formación, garantindo persoal cualificado e formado especificamente para esta doenza. Reclamou que “ningún doente quede sen o apoio que precisa” para atender esta enfermidade, que afecta a entre 2 e 3 persoas de cada 100.000.

Urxiu ao goberno galego a reducir a carga burocrática para atender esta doenza, implementando a consulta de acto único en tódalas áreas sanitarias de Galicia, para que teñan toda a atención integrada nunha única consulta, e realizando un rexistro de pacientes en Galicia.

Tamén pediu seguimento trimestral, atención psicolóxica en tódalas fases ou garantir o acceso á rehabilitación Salientou a necesidade de que teñan prescrición de cadeira de rodas a tempo, así como incorporar á carteira de servizos o dispositivo ou tablet e brazo articulado máis lector ocular.

Os socialistas galegos reclaman axilizar ao máximo a tramitación do Plan de Atención Individualizada, ademais de proceder de oficio á revisión de grao coa maior brevidade, ademais de garantir as condicións laborais dos coidadores e coidadoras. Pediulle á Xunta que incremente o investimento en investigación desta enfermidade, tal e como permite a Lei ELA, clave para atopar tratamentos máis efectivos que poidan mellorar a supervivencia e a calidade de vida destas persoas.

Advertiu que a Lei ELA vén conceder o “recoñecemento explícito” dos pacientes a recibir atención sanitaria e social especializada, garantindo o acceso a servizos de apoio temperán, tratamentos paliativos, axudas técnicas e recursos humanos acaídos, fundamentais para retardar o avance dos síntomas e mellorar a calidade de vida dos afectados por esta enfermidade. Tamén vén axilizar o recoñecemento do grao de discapacidade e o acceso a coidados domiciliarios e asistencia persoal especializada.