Elena Espinosa sinala que “non empezamos nada ben” ao esgrimir un informe xurídico sen informar aos grupos parlamentarios para suprimir parte das emendas á proposta de normas de funcionamento do órgano

Esixe un órgano “flexible, útil e transparente” con comparecencias en formato pregunta – resposta e que evite a imposición do PP para aprobar o Plan de Traballo e as conclusións

A viceportavoz do Grupo Socialista, Elena Espinosa, acusou hoxe ao PP de impoñer o “escurantismo total” na Comisión de Investigación sobre os contratos públicos da Xunta. Así o dixo logo de que na reunión de hoxe anunciaran, ao comezo da mesma, un informe xurídico que non presentaron aos grupos para suprimir parte das emendas presentadas polo PSdeG ás normas de funcionamento deste órgano.

Espinosa criticou que con esta manobra o PP obriga ao Grupo Socialista a posicionarse sobre un informe xurídico que non coñece, o que evidencia que “non empezamos nada ben” cos traballos do órgano.

A responsable socialista defendeu as 12 emendas presentadas polo Grupo Socialista ás normas de funcionamento da Comisión de Investigación, que era o que estaban a debater hoxe, que buscaban garantir unha Comisión de Investigación “flexible, útil e transparente”, pero que o PP rexeitou. Espinosa propuxo fixar un forma de comparecencias con pregunta – resposta para establecer unha Comisión “interactiva” dotada de dinamismo e “afastada de formatos estancos ou pouco produtivos”.

Sinalou tamén as propostas do Grupo Socialista para establecer unha maioría cualificada para aprobar o plan de traballo e as conclusións da Comisión para “evitar a imposición do grupo maioritario” e permitir que foran “amplamente aceptadas”. Estas propostas garantiría un “alto nivel de acordo e consenso” e reduciría a probabilidade de impoñer conclusións “controvertidas ou divisivas”.

Finalmente si que foi aceptada a primeira emenda presentada polos socialistas galegos, que pide que a información da Comisión estea a disposición de tódolos deputados e deputadas da Comisión á maior brevidade posible”.

Emendas do Grupo socialista aceptadas hoxe:

Emenda núm. 1

“Artigo 3. Emenda de adición. Na alínea a) deste artigo débese engadir in fine o seguinte texto: “… Esta información deberá estar a disposición dos deputados e deputadas que conforman a Comisión á maior brevidade posible”.