Carmen Dacosta sinala que o goberno galego tense convertido nunha “fábrica de exportación de talento” ao expulsar mozos e mozas a traballar fora

A portavoz de Emprego do Grupo Socialista, Carmen Rodríguez Dacosta, criticou hoxe que o goberno galego deixara sen gastar 2.184 millóns de euros en políticas activas de emprego dende o ano 2009. Dacosta responsabilizou á Xunta da perda de dinamismo do mercado laboral e da expulsión de novos traballadores, ata o punto de que segundo os datos de setembro tivo o terceiro maior crecemento do desemprego no Estado.

A responsable socialista presentou unha pregunta oral na Comisión de Emprego do Parlamento, na que apuntou que a destrución de 7.000 postos de traballo e o incremento de 2.300 parados, en contra da tendencia nacional, “da a medida do fracaso das políticas de emprego do goberno galego”. Considera “incomprensible” a pasividade do goberno galego, que deixou sen gastar 6 de cada 10 euros en políticas activas de emprego.

Esixiulle ao goberno galego que “utilice as competencias e as ferramentas que ten á súa disposición” para tratar de reverter a situación e acadar un crecemento robusto do emprego. Advirte que “ano tras ano demostran que non son quen de executar os fondos destinados ao emprego”, optando por “non facer nada fronte ao menor dinamismo do mercado laboral en Galicia”, co que “semella que nin o emprego nin o paro lles importan o máis mínimo”.

Dacosta esixiulle ao goberno galego unha explicación dos “datos alarmantes” de execución orzamentaria. Explica que na primeira metade do ano deixaron sen executar o 78 por cento das partidas para formación profesional de empregados, o 73,5 por cento das partidas para fomento da empregabilidade e o 70 por cento do programa de mellora da cualificación do emprego.

Fábrica de exportación

A responsable socialista alertou da debilidade das políticas laborais do goberno galego precisamente para os parados de longa duración, os mozos e as mulleres. Sinalo neste sentido que se teñen convertido nunha “fábrica de exportación de talento” ao amparar un mercado laboral carente de oportunidades para mozos e mozas, con taxas de actividade máis baixas e elevada precariedade, provocando a perda de 87.300 mozos e mozas entre 2010 e 2023.

O mercado laboral feminino, dixo, “segue a manifestar peores condicións que o masculino en tódalas súas variables”, e mentres as mulleres cobran un 19 por cento menos que os homes, e preto de 5.000 euros ao ano “proveñen da desigual retribución que teñen as ocupacións masculinizadas.

Reclamoulle ao goberno galego que poña en marcha un programa de inserción laboral para desempregados centrado na mellora da cualificación dos traballadores e traballadoras e que tome medidas diante da baixas execución en materia de emprego nos últimos 15 anos, poñendo en marcha un Plan de execución orzamentaria de acordo coas organizacións sindicais.