A deputada por Pontevedra Paloma Castro esíxelle ao Goberno galego que corrixa as deficiencias na reparación do firme e elimine a grava das beiravías, tal e como están a reclamar usuarios e usuarias debido á súa perigosidade

A deputada socialista no Parlamento de Galicia Paloma Castro faise eco das numerosas queixas do colectivo de ciclistas e motociclistas polo perigo para a seguridade viaria que se está a producir na estrada autonómica PO-531 (Pontevedra-Vilagarcía) por mor dunhas chapuceiras obras de asfaltado que está a realizar a Consellería de Infraestruturas.

Os traballos, que comezaron hai varias semanas consisten nun parcheo cunha capa de asfalto dun grosor case inapreciable e baixa calidade que deixa grandes cantidades de grava nas beiraravías da estrada.

Algunhas das zonas máis afectadas están situadas entre Alba e Campañó, a carón da entrada á cidade de Pontevedra. Segundo confirman persoas afectadas xa se teñen producido “sustos” pola abundancia de material árido. As beiravías desta estrada son moi estreitas e non foron ampliadas con motivo da construción dunha senda peonil, tamén executada con criterios de dubidosa calidade.

Ademais, estas estreitas marxes da estrada contan con liña ranurada para advertir aos condutores dos automóbiles que saen da calzada. O resultado é que aos ciclistas resúltalles completamente imposible circular pola beiravía e vense obrigados a transitar pola calzada. “Do contrario, xóganse a súa integridade física”, denuncia Castro.

Por outra banda, a deputada lamenta o chapuceiro asfaltado, pois a capa de mestura bituminosa que se está a aplicar é tan fina que hai zonas nas que “transparentan” os pasos de peóns e outras marcas viarias. “Están a facer que fan, simulando un asfaltado cando non chega nin a lavado de cara”, di.

Con todo, Paloma Castro esixe que se corrixa de inmediato a acumulación de grava nas beiravías e recórdalle á conselleira de Infraestruturas que os ciclistas e os motoristas forman parte dos colectivos sensibles nas estradas.

Ademais, destaca, as estatísticas demostran que na provincia de Pontevedra máis dun 60 % dos accidentes e tamén das vítimas mortais prodúcense en estradas da Xunta de Galicia, “e, con chapuzas como a que se está a perpetrar na PO-531, non se están sentando as bases para corrixir esas negras estatísticas da Rede Autonómica de Estradas”, lamenta.

Por todo elo, Paloma Castro vén de rexistrar unha serie de iniciativas parlamentarias co fin de que a Cámara inste á Xunta de Galicia a corrixir de inmediato as deficiencias na reparación do firme e a acumulación de áridos nas marxes da vía, de modo que se garanta a seguridade dos usuarios.