Pide para os pacientes galegos o mesmo trato e calidade de servizo que no resto de comunidades autónomas que incorporan estes medicamentos

A portavoz de Sanidade do Grupo Socialista, Elena Espinosa, reclamoulle hoxe á Consellería de Sanidade que incorpore os novos anticoagulantes alternativos ao sintrom nas indicacións médicas dos facultativos do Sergas. Espinosa presentou unha pregunta oral na Comisión de Sanidade do Parlamento na que lle reclamou á Xunta que garanta a mesma calidade na atención aos pacientes galegos que noutras autonomías.

Advertiu que a resistencia do goberno galego a incorporar estes novos tratamentos está a provocar “unha clara inequidade cos pacientes galegos” respecto doutras comunidades autónomas que si teñen acceso a esta medicación. Dixo que “estamos a falar dun mellor tratamento, unha mellor calidade de vida e evitarlles ir de forma periódica a un centro de saúde ou a un hospital, colaborando a desconxestionar a nosa atención primaria”.

Explicou que estes fármacos, malia que teñen baixado notablemente de custe, continúan a ser máis caros que o sintrom, pero “son máis efectivos , e reducen as visitas ao sistema sanitario” que si teñen que realizar os pacientes galegos. Os novos anticoagulantes orais producen o mesmo efecto pero son máis estables, demostraron ser mellores na protección fronte ao ictus e reducen un menor risco de hemorraxias intracraneais mortais, reducindo a incidencia de ictus.

A variación na concentración dos medicamentos que se están a administrar hoxe obriga á realización de analíticas continuas pola elevada concentración do fármaco en función da dose inxerida en función das circunstancias diarias da vida do paciente. Isto fai que cun exceso rexistra aparición de hemorraxias, e de trombos por defecto, un perigo que se reduce cos fármacos de nova xeración.