denuncia que o PP leva 13 anos tomándolle o pelo aos pontevedreses e pontevedresas mantendo bloqueada a actuación

A parlamentaria socialista Paloma Castro reclamoulle hoxe á Xunta que informe sobre a situación do proxecto de dragaxe do Lérez e que “atopen alternativas para determinar un punto de vertido compatible coa normativa medioambiental. Castro presentou unha pregunta oral na Comisión de Medio Ambiente do Parlamento na que lle esixiu á Xunta que resolva esta actuación coa que leva 13 anos “tomándolle o pelo” aos pontevedreses e pontevedresas.

A responsable socialista acusou ao goberno galego de seguir “botando balóns fora no canto de asumir a súa ineptitude na xestión ou falla de vontade política” para levar adiante un proxecto que a quedou “caducado e ten que ser revisado e actualizado” para facer novas medicións dos áridos, os tramos de retirada de sedimentos e actualizar os prezos.

Manifestou que o goberno galego ten demostrado que “nunca tiveron o mínimo interese en executar este proxecto porque o PP non cre no río”, e lamentou que tanto dende a Xunta -como demostra que o proxecto non figure nos Orzamentos dende 2022- como dende o concello gobernan “de cosas a este ben natural”.

Lembrou así o desleixo do goberno de Lores, que aínda non lle remitiu ao Estado os proxectos para a renaturalización das marxes do río, para os que o Miteco dispón dunha partida de 25 millóns de euros.

Advertiu que a dragaxe do Lérez pasou de ser unha promesa electoral “comodín” de Feijóo cada 4 anos a ser empregada de novo agora por Rueda como candidato nas últimas eleccións autonómicas. A realidade é que se teñen revelado “inviables xurídica e moralmente” para dar unha solución á dragaxe, e lembrou que intentaron depositar os lodos na illa de Tambo, afectando á zona de marisqueo, e pasaron a sinalar á Illa de Sálvora, en pleno Parque Natural.

Criticou que intenten “levantar a alfombra para meter debaixo o lixo”, pero neste caso “con esta decisión porían en perigo toda a diversidade mariña da zona, por non falar da contaminación que pode xerar e as consecuencias económicas para todas aquelas persoas que viven da pesca de baixura”.