Noa Díaz considera “inadmisible que o PP pretenda abrir este debate” facendo seguidismo das “ocorrencias de Feijóo” e polo que Rueda “terá que responder no Parlamento”

A portavoz de Igualdade do Grupo Socialista, Noa Díaz, vén de rexistrar unha batería de iniciativas parlamentarias para reclamarlle á Xunta que realice un rexeitamento expreso á práctica dos ventres de alugueiro. A parlamentaria socialista lamenta o “paso atrás” do PP ao abrirse a regular esta práctica, prohibida por Lei, e que supón “un retroceso nas políticas feministas que protexen o dereito das mulleres e das nenas e nenos”.

A responsable socialista sinala que Rueda “terá que responder no Parlamento de Galicia”, da man das iniciativas presentadas polo Grupo Socialista, logo de sumarse a “unha deriva máis das ocorrencias de Feijóo”. Considera “inadmisible que o PP pretenda abrir este debate” sobre “unha das formas máis crueis de explotación dos corpos das mulleres, medie ou non intercambio económicos”.

Alerta de que esta práctica “socava os dereitos das mulleres, especialmente das más vulnerables, mercantilizando os seus corpos e as súas funcións reprodutivas”. Advirte que supón unha forma de “violencia contra a muller”, ademais de que “atenta contra as súa dignidade”, ao entendela “como un obxecto a disposición das persoas que cren que a maternidade é un dereito, cando é un desexo”.

Noa Díaz apunta que “as mulleres non temos corpos que poidan ser mercantilizados e empregados como vasillas, desprendéndonos de toda dignidade”, ademais de que “na súa inmensa maioría practícase sobre os corpos das mulleres máis vulnerables, a quen temos a obriga de protexer”.

Explica que esta práctica está prohibida pola lexislación española, polo que estes contratos están declarados “nulos de pleno dereito” porque “rompe coa determinación da filiación polo parto, cousifica o corpo das mulleres e converte o nenonato en obxecto dun contrato”.

A parlamentaria socialista advirte que a pesares desta prohibición, en España “existe un negocio moi lucrativo de alugueiro de ventres” en terceiros países. Reclámalle así á Xunta que se dirixa ao Goberno do Estado para reforzar as garantías que eviten esta práctica prohibida e “perseguir e sancionar fortemente ás axencias que se dediquen a esta actividade, así como estudar as medidas oportunas para evitar que se realice a través doutros países”.