A viceportavoz do Grupo Socialista reclama unha aposta decidida por innovar e esixe “incrementar os orzamentos e executalos”

A portavoz de Turismo do Grupo Socialista, Leticia Gallego, criticou hoxe o “modelo errático” da Xunta de Galicia en materia turística, “incapaz” de avanzar na desestacionalización e unicamente centrado no Xacobeo. Gallego interveu na comparecencia da directora da Axencia de Turismo de Galicia no Parlamento para reclamar un turismo “innovador, sustentable, dixital e competitivo”.

A responsable socialista avogou por un turismo que “debera xogar un rol clave na recuperación económica e social” porque, dixo, “o turismo é sinónimo de emprego”. Sinalou o reto colectivo de “estruturar un modelo turístico que poida espallarse no terreo, que se desestacionalice, que sexa xerador de empregos dignos, correctamente remunerados e con xornadas razoables”.

En definitiva, reclamou, un turismo consolidado como “fonte de riqueza, estabilidade e cohesión territorial e social”, que ademais “fomente a convivencia e a cohabitación, a diversidade, a harmonía e a pluralidade”. Sinalou que “somos unha Comunidade para visitar todo o ano, que aínda que teñamos a franxa litoral máis grande e España somos máis que praia, e aínda que posuamos unha ruta de peregrinaxe única, somos máis que o Camiño de Santiago”.

Advertiu que “a Xunta de Galicia non pode condicionar o sector turístico galego só ao Xacobeo, ao que non lle restamos importancia, pero a riqueza turística de Galicia é moi grande”. Puxo o Nadal de Vigo como exemplo de proposta turística desestacionalizada, un “fenómeno que transcende fronteiras” grazas ao traballo dun alcalde que foi quen de crear “un dos eventos máis importantes na atracción de turistas de Galicia”, como son as luces de Nadal de Vigo, coa “oposición” da Xunta.

A parlamentaria socialista reclamou unha estratexia participativa coas entidades locais, que “son as que acollen e dan resposta inmediata aos visitantes”, e propuxo a constitución dunha Mesa de participación na que o sector e as administracións implicadas “poñan en común proxectos e respostas coordinadas”.

Instou ao goberno galego a impulsar o cambio do modelo turístico, e “para iso ten que incrementar os Orzamentos e executalos”, uns Orzamentos que para o próximo ano ascenden aos 134 millóns de euros grazas a que contan con 42 millóns procedentes do mecanismo de Recuperación e Resiliencia do Goberno de España.

Leticia Gallego dixo que a Xunta “ten que facer unha aposta decidida por innovar no turismo, como fai o Executivo estatal, que aumentou o orzamento específico un 1,1143 por cento entre 2018 e 2023.