O Parlamento aproba a nosa proposta para reclamarlle á Xunta unha convocatoria extraordinaria de prazas estables para Medicina Interna e axilizar as xestións para incrementar as prazas MIR
Begoña Rodríguez Rumbo insiste en que a Xunta cargará sobre a cidadanía os custes da Lei do Ciclo Integral da Auga
12/07/2022
Luis Álvarez aféalle a Rueda a supresión da Tarxeta Básica e critica o “simpa permanente” da Xunta en medidas sociais
13/07/2022
Julio Torrado advirte ao goberno galego “perdido e desesperado” pola “situación crítica do sistema sanitario”
O Pleno do Parlamento aprobou hoxe parcialmente unha moción presentada polo Grupo Socialista para que a Xunta habilite unha convocatoria extraordinaria de prazas estables para Medicina Interna. O portavoz de Sanidade, Julio Torrado, reclamoulle ao goberno galego que “ademais de aprobar iniciativas para sortear o bochorno de oporse, teñen que cumprir co que acordamos”.
Julio Torrado presentou esta iniciativa cunha batería de propostas a medio, curto e longo prazo para afrontar a situación laboral do persoal deste servizo. En primeiro lugar e de forma inmediata, reclama unha convocatoria extraordinaria de prazas estables para facultativos especialistas en Medicina Interna para cubrir parcialmente as demandas máis urxentes de persoal nos diferentes servizos de Galicia.
A medio prazo, propón “comprometer a convocatoria do máximo posible de prazas de especialista en medicina interna no sistema público de saúde de Galicia nas vindeiras 3 ofertas públicas de emprego que convoquen”.
Xa a longo prazo, e para resolver ao problema con carácter estrutural, propón axilizar as accións necesarias para habilitar máis volume de prazas de formación en Galicia “en acordo e diálogo co persoal titor, e solicitar ao goberno de España que amplíen o volume de prazas MIR para poder ofertar”. Ademais, reclama reforzar as ofertas para cubrir prazas so hospitais comarcais, con “criterios de discriminación positiva” para fomentar a presenza estable de profesionais nestes centros.
Torrado lamentou sen embargo que o PP esixira retirar do acordo a parte da proposta que incorporaba “realizar os trámites e procedementos necesarios para establecer como criterio continuado a oferta de prazas estables aos profesionais que terminen a formación MIR en medicina interna en Galicia para que continúen na mesma área sanitaria durante os 4 anos seguintes a terminar a súa formación.
Perdido e desesperado
O portavoz de Sanidade do Grupo Socialista, Julio Torrado, sinalou hoxe que o goberno galego está “perdido e desesperado” pola “situación crítica” do sistema sanitario. O responsable socialista lamentou que “mentres o sistema sanitario treme, están máis preocupados por vender un relato de éxito que de afrontar os problemas reais”.
Advertiu “certa desesperación” do conselleiro de Sanidade, que “quixo enganar” na pasada sesión parlamentaria intentando facer pasar como xubilación o que se demostrou que era a dimisión en toda regra do xefe do servizo de Medicina Interna do Hospital de Santiago.
Cualificou de “bochornoso espectáculo” a reacción do conselleiro e do goberno galego diante desta situación, que finalmente tiveron que admitir, e critico que “intentan atacar ao PSdeG por trasladar os problemas en troques de afrontar os problemas”. Ademais, dixo, estes veñen derivados dos “recortes e desatención” do goberno galego cara á sanidade pública, máis preocupados de “armar un relato de márketing” eficaz que dunha xestión acaída.
Texto da iniciativa aprobada hoxe:
-“O Parlamento galego insta á Xunta de Galicia a:
- Realizar unha convocatoria extraordinaria, á maior brevidade, de prazas estables para facultativos especialistas en medicina interna que cubran parcialmente as demandas máis urxentes de persoal dos diferentes servizos de medicina interna de Galicia, con atención ás necesidades de cada área sanitaria.
- Comprometer a convocatoria do máximo posible de prazas de especialista en medicina interna no sistema público de saúde de Galicia nas vindeiras 3 OPE que se convoquen.
- Axilizar as accións necesarias para habilitar máis volume de prazas de formación en Galicia en acordo e diálogo co persoal titor, e solicitar ao goberno de España que amplíen o volume de prazas MIR para poder ofertar.
- Reforzas as ofertas para cubrir prazas nos hospitais comarcais, establecendo criterios de discriminación positiva baseados tanto nas propias condicións como nas vantaxes en futuros procedementos de desenvolvemento profesional, para garantir a presenza estable de profesionais nestes centros, facilitando a mellor calidade asistencial na vinculación profesional – paciente”.
