Repróchalle á Xunta a súa desaparición ante a crise mentres o goberno central toma medidas para axudar aos sectores máis afectados para paliar a situación derivada da guerra de Ucraína, a alza de prezos e a seca

O deputado socialista Martín Seco incidiu hoxe na desaparición da Xunta ante a crise que está a padecer o sector agrario en Galicia por mor da crise derivada da guerra de Ucraína, a alza de prezos e a seca. De maneira concreta, demandoulle ao goberno galego que habilite axudas para complementar as que o goberno central xa está destinando ás granxas de carne de vacún.

Neste caso, o obxectivo  sería o de chegar a equilibrar as primas previstas para o sector lácteo. Trátase, en palabras de Martín Seco, dunha “cuestión de xustiza e porque ademais estas granxas supoñen o derradeiro soporte económico e social para comarcas enteiras nas que o despoboamento e o colapso demográfico son xa unha realidade”.

O deputado socialista formulou esta mañá unha pregunta na Comisión de Agricultura do Parlamento onde cuestinou ao goberno galego polas medidas que ten previsto adoptar ante a crise do sector agrario. Así, tras lembrar que o goberno do Estado vai destinar 169 millóns de euros para o sector lácteo e 128 para outros sectores agrarios, “seguimos sen ver como se publica no Diario Oficial de Galicia cal será o compromiso da Xunta coa nosa agricultura e gandería”.

Neste contexto, salientou tamén a necesidade de establecer liñas de apoio económico para os sectores cunícola, porcino e avícola, “que tamén sufriron e sofren a crise polo peche de mercados e o encarecemento dos pensos”. Na mesma liña, instou á Xunta a apoiar a produción de pataca, “tendo en conta que este sector é un dos grandes prexudicados polo encarecemento dos combustibles e a enerxía, así como polo prezo disparado no que se están a situar os fertilizantes”.

Na súa intervención, Martín Seco lembroulle á Xunta que hai sectores como o da carne, “que vén sufrindo unha crise estrutural dende fai moito tempo e que foi agravada pola crise da pandemia”. Ampliou esta situación a outros sectores como o da carne de polo, porco e coello, “que tamén están a padecer a crise derivada dos prezos da enerxía e que tamén deben ser atendidos pola administración galega”.

Con todo, lamentou que o goberno siga “sen poñer enriba da mesa nin unha soa medida para axudar ao sector agrario, agás a de avalar préstamos para pagar os adiantos derivados da PAC”. En consecuencia, “todo un goberno con competencias plenas na materia  que se mostra como unha simple entidade financeira”.

Fronte a esta actitude, Martín Seco lembrou que o goberno do Estado aprobou un paquete de axudas duns 360 millóns de euros para o sector agrario. Destes, 169 son especificamente para o sector lácteo e 193 para o sector agrario e gandeiro, que ademais tamén se beneficiarán da redución de vinte céntimos por litro de carburante.

Así, o sector produtor de leite de vaca recibirá uns 124 millóns de euros e Galicia será un dos grandes beneficiados. “Queda por ver”, subliñou, “o reparto que se farán deses 193 millóns para os sectores agrarios e gandeiros, 65 procedentes de Europa e complementados con 128 millóns, é dicir, poñendo o goberno central un 200% máis”.

Por iso, Martín Seco remarcou que “cómpre agora que a Xunta diga e publique canto vai a poñer dos seus fondos propios para axudar aos sectores agrarios, e a onde quere dedicalos”. Neste senso, incidiu en que “entendemos que todos os gobernos deberan de estar á altura das circunstancias, tanto sexan a nivel europeo, estatal ou autonómico, xa que é a Xunta a que ten as competencias en agricultura e gandería do noso país”.