A portavoz do Grupo Socialista na Comisión da CRTVG no Parlamento, Noa Díaz, criticou a “inaceptable” e “bochornosa” falla de calidade da retransmisión da “TanxuFesta” posterior ao Festival de Benidorm por parte da TVG. Díaz presentou unha pregunta oral hoxe no Parlamento na que criticou a decisión de desprazar un equipo ao lugar para emitir en directo a través de teléfonos móbiles.

Díaz lembra que o programa, que se alongou ata a madrugada, contou cunha calidade precaria que “non cumpriu en ningún momento os mínimos estándares de calidade esixidos a uns medios públicos”, facendo por momento imposible distinguir a imaxe e o son da retransmisión. O ente optou por retransmitir pola canle habitual un programa emitido polas plataformas dixitais Youtube e Twitch, que admiten uns estándares de calidade notablemente inferiores.

Esta decisión, dixo, constata a súa “falla de respecto que parece ter a dirección da CRTVG polos nosos medios públicos, o menosprezo pola audiencia e o desprezo ao persoal traballador do ente e a súa profesionalidade”, que quedou seriamente danada coa dita emisión.

Lamentou que “diante dunha oportunidade única de sumarse á expectación que existía entre toda a sociedade galega e de facer país, non consideraran oportuno facer un programa en directo de calidade, cos recursos propios e cos profesionais da casa, que estamos seguros farían un programa á altura das circunstancias”.

Neste sentido, propúxolle á dirección do ente “facer este tipo de experimentos, por exemplo, co Foro La Toja, que si retransmitiron en directo”. Advertiu con sasrcasmo que “queren unha televisión e radio públicas low – cost”, para o que, engadiu, “non precisan da cantidade inxente de diñeiro” que supoñen os orzamentos da CRTVG e que “vanse en pagarlle o salario a Paquirrín 3 ou 4 veces ao ano, que é para o que parece querer gastar o diñeiro”.