Paloma Castro considera “fundamental” que o goberno galego estenda a cultura da prevención para evitar que sigan a incrementarse este tipo de delitos

O Parlamento de Galicia aprobou hoxe por unanimidade unha iniciativa do PSdeG na que se lle reclama á Xunta de Galicia que adopte medidas para loitar contra a ciberdelincuencia. A deputada socialista Paloma Castro defendeu esta proposta na Comisión Institucional do Parlamento, onde alertou do preocupante aumento deste tipo de delitos. Por iso, demandou que o goberno galego siga a avanzar na modernización do país para axudar ás persoas a adaptarse aos tempos coa necesaria protección que debe dar unha administración pública.

Con ese obxectivo presentou unha proposición non de lei que, tras unha transacción, contou co voto favorable de todos os grupos políticos. Nela solicítaselle á Xunta que leve campañas dirixidas á cidadanía para informar e concienciar sobre a importancia da ciberseguridade, alertar das condutas que poidan ser sospeitosas deste tipo de estafas e para mellorar as capacidades no uso da tecnoloxía dixital.

“Estender a cultura da prevención é fundamental para evitar que sigan a aumentar estes delitos”, remarcou Paloma Castro. Por iso, considerou “tan necesario” artellar campañas divulgativas, en colaboración con sectores mediáticos, que teñan como finalidade informar, promover e difundir”.

Na mesma liña, Castro tamén reivindicou un servizo de asesoramento para as persoas ou entidades que sofren esta situación ou subvencionar cursos de formación para actualizar os coñecementos de avogados e avogadas sobre as distintas modalidades delitiva a través das TICs.

Paloma Castro explicou que as medidas  do goberno da Xunta para loitar contra a ciberdelincuencia non poden ser unicamente protexer á administración pública dos posibles ciberataques coa instalación de programas máis seguros, senón que “tamén ten que protexer á cidadanía”. Nesta liña incidiu en que “non queremos que o goberno galego asuma competencias impropias senón que nos conformamos con que asuma as que lle corresponden”, tal e como fan comunidades como A Rioxa, Aragón, Andalucía e Cataluña”.

Paloma Castro reivindicou esta necesidade tras alertar sobre o aumento da criminalidade informática en Galicia ata acadar datos “moi preocupantes”. Nesta liña, aludiu ás cifras ofrecidas recentemente polo Fiscal Xefe de Galicia e que constatan un incremento do 135% dos procedementos xudiciais abertos en 2020, coa apertura de 1.085 procedementos por delitos informáticos, dos que case o cen por cen corresponden a estafas electrónicas.

En paralelo, tamén lembrou que o balance de criminalidade do Ministerio do Interior fala de que, en 2021, 1 de cada 4 delitos foi unha estafa informática. En concreto, en Galicia cometéronse en Galicia nese ano 88.000 delitos, dos que case 20.000 foron ciberestafas, que subiron así un 53%.

Paloma Castro enmarcou esta situación nun contexto no que a pandemia fixo que a xente utilizase máis as novas tecnoloxías para todo tipo de trámites, o que produciu un aumento desta nova tendencia delitiva. Porén, advertiu que “a dixitalización veu para quedar e que, irremediablemente, a delincuencia tradicional está a mudar pola informática”.

OS INCUMPRIMENTOS DE FEIJOO

Na súa intervención Paloma Castro tamén lamentou que, en materia de ciberseguridade, o presidente da Xunta “leva moito prometido e pouco feito”.

Así, recordou que en marzo do 21 prometeu a creación dun Centro de Ciberseguridade de Galicia na Cidade da Cultura. Porén, un ano despois falou de que a sede sería o polígono de san Cibrao das Viñas, en Ourense.

“Un ano despois seguimos no mesmo punto”, advertiu, “e xa non sabemos onde vai estar o centro”. “O que si temos claro é que non se avanzou nada e que Feijoo minte máis que fala”.

Como exemplo disto, referiuse tamén ás acusacións de Feijoo ao goberno de lucrarse coa suba dos prezos da gasolina cando son as comunidades as que reciben o 58%. Trátase dunha “clara estratexia de enganar á cidadanía e aproveitarse dun momento de dificultade económica para sacar beneficio político”.

O ACORDO APROBADO HOXE

O Parlamento de Galicia insta á Xunta de Galicia a levar a cabo campañas dirixidas á cidadanía para informar e concienciar sobre a importancia da ciberseguridade, alertar das condutas que poidan ser sospeitosas deste tipo de estafas e para mellorar as capacidades no uso da tecnoloxía dixital