Denuncia que a recente supresión de liñas “sen avisar” afectou incluso a usuarios e usuarias menores de idade

 A deputada socialista Patricia Otero urxíu hoxe á Xunta de Galicia a darlle “unha solución rápida aos numerosos problemas que está a padecer a veciñanza da Comarca do Eume como consecuencia do mal funcionamento do transporte interurbano de viaxeiros por estrada”.

Nunha pregunta á conselleira de Infraestruturas e Mobilidade, a parlamentaria do PSdeG reclamoulle ao goberno galego que deixe de botar “balóns fóra” e “sexa sensible” asnte os problemas que está a padecer a veciñanza, máis alá de que “as competencias e a responsabilidade son exclusivamente da Xunta de Galicia”. Para seguir a intervención da parlamentaria do PSdeG no Pleno, na que recollía as demandas municipais, asistiron ao Parlamento os alcaldes de Pontedeume e Cabanas e tenente de alcaldesa de Miño.

Patricia Otero alertou de que as eivas detectadas son máis patentes tras a recente supresión de varias liñas sen previo aviso, o que incluso “está a ter consecuencias negativas para os usuarios e usuarias menores de idade”. De feito, denunciou que na semana do 10 de xaneiro “houbo escolares que chegaron tarde ás súas clases” e que incluso “varios deles quedaron máis de media hora sos na parada esperando que o bus os viñera recoller”.

Neste contexto, a deputada socialista lembrou que, dende que hai aproximadamente un ano a nova adxudicataria comezou a prestar o servizo na comarca do Eume, “son numerosas as queixas dos usuarios e usuarias en relación a este servizo”. As principais están motivadas polos atrasos e reducións de frecuencias e horarios, e nomeadamente de diversos servizos na liña que comunica Pontedeume coas cidades de Ferrol e A Coruña.

Otero incidiu en que, por parte da veciñanza eumesa, así como polos concellos da bisbarra afectados piden “unha solución inmediata a estes problemas”. Neste escenario, foron numerosas as ocasións nas que se lle trasladou á Consellería de Infraestruturas e Mobilidade “a necesidade de que se adoptasen as medidas necesarias para o correcto funcionamento deste servizo”.

Ademais, na auditoría realizada pola Consellería e remitida recentemente ao Concello de Pontedeume recollíase a proposta de reforzar servizos e frecuencias nun 11 por cento dando prioridade ás horas puntas da mañá, de mediodía e da tarde para favorecer a conciliación da vida familiar e laboral e estudantil.  Pero “lonxe desta mellora, e sen avisar”, a Xunta de Galicia, procedeu á supresión de varias liñas deste servizo na semana do 10 de xaneiro.

Así, a parlamentaria do PSdeG sinalou que esas “necesarias melloras” neste servizo de transporte interurbano que pasan por recuperar os servizos que ofrecía a anterior empresa adxudicataria, aumentar as frecuencias, establecer a gratuidade para os estudantes e ofrecer unha información veraz sobre os horarios.