Gonzalo Caballero denuncia que Galicia está “á cola de España” en rastrexadores e axudas directas á hostalería: “Feijóo ten que rectificar esas dúas grandes eivas”
O Grupo Socialista urxe á Xunta a desbloquear a parcelaria de Dodro – Laíño II
16/11/2020
O Grupo Socialista alerta da “tendencia extrema á privatización dos servizos xeriátricos” en Galicia
16/11/2020
O voceiro socialista chama a atención sobre a negativa da Xunta a intervir unha residencia privada de Mos, cuns 150 contaxios: “Hai que reforzar a atención aos nosos maiores”
O secretario xeral do PSdeG, Gonzalo Caballero, denunciou hoxe que Galicia está “á cola de España” tanto en número de rastrexadores como de axudas directas aos sectores máis afectados pola pandemia.
“Fai falla unha resposta eficaz e suficiente dende a Xunta”, recalcou Gonzalo Caballero, para recordar a renglón seguido que Feijóo comezou anunciando 6.152 rastrexadores que logo reduciu ata 700, mentres o seu conselleiro de Sanidade segue negándose a facilitar os datos.
Ademais, apuntou que os datos do Instituto Carlos III reflicten que en Galicia se descoñece a orixe de “dous de cada tres positivos”, co que non se pode conter a propagación do virus. “Estamos cunha política de rastrexo errática e desnortada”, sentenciou o máximo dirixente socialista.
Outra “eiva” na que Feijóo ten que “rectificar”, profundou, é no relativo ás axudas directas aos sectores máis afectados polas restricións. “Aínda non hai un só negocio en Galicia que recibira un euro a pesares de que Feijóo pechou a hostalería en 60 concellos hai vinte días”, censurou Gonzalo Caballero.
Así mesmo, o secretario xeral contrastou os 16 millóns de euros comprometidos por Feijóo para unhas axudas que aínda non se materializaron cos 40 millóns de euros consignados por Euskadi para o mesmo fin ou os 30 millóns da Rexión de Murcia. “Fai falla un plan de maior dimensión, porque a hostalería está afogada”, evidenciou.
RESIDENCIA DE MOS
En paralelo, o líder do PSdeG puxo o foco no contaxio masivo na residencia de Mos, onde se rexistraron uns 150 positivos por covid nas últimas xornadas.
“É algo que non se pode consentir”, recalcou Gonzalo Caballero, quen fixo unha chamada á Xunta para tomar todas as decisións necesarias neste centro e para tomar medidas encamiñadas a “reforzar a atención aos nosos maiores”.
Do mesmo xeito, o voceiro socialista no Parlamento de Galicia reclamou unha vez máis cambios no protocolo fronte aos contaxios en residencias, consciente de que o elevado número de casos require “unha nova política”.
