O portavoz de Marisqueo do Grupo Socialista, Julio Torrado, criticou hoxe o “hermetismo extremo” da Consellería de Pesca diante da incidencia da marteilía, un parasito que está a atacar aos bancos de berberecho de Galicia dende 2012. Torrado presentou unha interpelación na que reivindicou máis apoio ao sector en forma de “certezas” por canto dependen de “saber o que vai acontecer” coa produción.

O responsable socialista sinalou que o sector extractivo careceu de resposta directa por parte da Xunta, que “non foi quen de facer unha planificación a longo prazo”, provocando que os mariscadores galegos se sentiran “desesperanzados e desprotexidos”. Criticou neste sentido a “negación e falla de autocrítica grande” dende a Xunta de Galicia, caeu nunha “actuación errática porque en realidade non houbo capacidade de explicar o que sucedía”.

Reclamoulle á conselleira que atenda á “potencia investigadora de Galicia”, e afeoulle que “unicamente tiveran en conta investigacións que defendían que a Consellería non era culpable” da situación. Torrado esixiu coñecer as previsións estimadas polo goberno galego para “saber se a situación seguirá a ser boa –como na actual campaña extractiva- ou se teñen que prepararse porque a situación non vai ir ben”.

Marteilía

Julio Torrado explicou que a marteilía apareceu nos Bancos do Ulla, na Ría de Arousa, en 2012, e a partir de aí ofreceu “datos erráticos” combinando campañas máis afectadas, como o punto mínimo acadado en 2014, así como as baixadas de 2017 e 2018, mentres outros exercicios apuntaban unha certa recuperación, como foi en 2016 ou este mesmo inverno.

Criticou que a Consellería de Pesca empregara as campañas con máis produción para lanzar unha imaxe positiva, no mesmo sentido que as campañas con menos recollida, no que se aferraban ao elevado prezo derivado precisamente da escaseza de produto. Reclamoulle ao goberno galego que comparta os datos de que dispón para “alertar ao sector”, que actualmente “carece de capacidade de previsión sobre o que pasa”