A portavoz de Pesca do Grupo Socialista, Patricia Otero, cualificou hoxe de “ridículas” as aportacións previstas pola Consellería do Mar para contribuír a frear os efectos do cambio climático. Otero presentou unha pregunta en Comisión na que criticou que este departamento destine menos do 0,2 por cento do seu orzamento para un obxectivo da relevancia como é a loita contra a crise climática.

A responsable socialista criticou a “pouca iniciativa” amosada pola Consellería neste sentido, xa que a súa aportación redúcese a 140.000 euros para limitar o impacto da pesca no medio mariño, 100.000 á mellora da eficiencia enerxética e outros 80.000 para a substitución de motores. Reclamoulle ao Executivo autonómico que “deixen de votar balóns fora” e asuman a súa parte da iniciativa para frear unha situación que terá consecuencias irreversibles sobre a biosfera.

Dixo que as accións de cara a un desenvolvemento sostible son “necesarias e posibles se as institucións establecen os recursos que propicien a innovación tecnolóxica e os cambios nas condutas para adaptar” aos sectores implicados. Reivindicou medidas de apoio concretas e tamén “accións de divulgación e sensibilización en relación aos cambios que se están a producir na pesca pola evidencia do cambio climático”.

Otero citou as conclusións da recente folga mundial polo clima, que o pasado venres reclamou a declaración da emerxencia climática e supuxo unha chamada de atención pola urxencia de reducir á metade a emisión de gases contaminantes nos próximos 10 anos.

Alertou de que o horizonte ao que se encamiña a humanidade pasa por vagas de calor máis frecuentes e intensas, secas, chuvias extremas e inundacións, o aumento do nivel do mar ou o incremento do nivel de acidez dos océanos, maior risco de pragas agrícolas, desprazamentos de especies e cultivos a zonas elevadas, desxeo acelerado e lumes máis voraces en épocas non habituais.